J&K te BJP Councillor ke Terrorists para moraishe

Srinagar: Wednesday din te terrorists khan para Bharatiya Janata Party (BJP) councilor ke Pulwama Tral jaga te bantok para marikena morishe koishe. Terrorists khan para Rakesh Pandita oper te gooli marishe aro tai ke serious te hospital loikena jaishe, hoilebi olop thiri thaka beche tai jokom powa nemite morishe. Security forces para etu jaga toh bondh korishe aro itya hamla kora manuh ke thuriboli persari ase koishe. Police laga khobor hesab te, Rakesh Pandita toh tai laga sathi Mushtaq Bhat ke lok koriboli jai thaka samai tai logot hamla korishe, Bhatt toh be besi serious te jokom hoikena ase koishe. “aji sam te, tin(3) jun najana terrorists khan para Municipal Councillor, Rakesh Tral Bal logot tai laga sathi Tral Payeen lok koriboli jai thaka samai bantok para hamla korishe. Rakesh Pandita toh jokom powa nemite mori jaishe aro tai sathi laga chokri toh besi beya para jokom hoishe,” koikena  Jammu & Kashmir Police para statement te janaishe. Etu councilor toh Srinagar te tuita(2) PSOs logot secure jaga te bohi thaka ase. Hoilebi, tai Tral te visit koriboli jai thaka samai te PSOs thaka nai. Former Jammu & Kashmir,  Chief Minister para koishe ke, BJP leader ekta ke morai deya toh besi asorit ase. Etu neshina hamla kora para toh J&K te olta jamila soruh hoi. Ami laga mon dukh howa toh tai laga ghor manuh aro sathi khan logot janai ase”, koikena Mufti para koishe. Jammu & Kashmir laga BJP spokesperson, Altaf Thakur para khobor powa beche besi tangor kelaaf korishe aro etu hamla toh bapana kora nai” koishe. Tai aro koishe, etu neshina hamla kora te BJP leaders para manuh ke sai thaka toh narokibo, koikena janaishe.