JAIPUR, OCTOBER 5 : BJP President Amit Shah pora Thursday din NDA Sorkar kan tusera desh pora khushi-khushi aha kan wabas aro bataidebole kuri ase koi kena janaise. Aro tai bi ami sorkar kan etu khushi-khushi aha kan nemite sai ase. Aro chuti thuri baise koile neju jaka te aro wabas debo koi kena Sikar te Purana-Sepai kan nemite ekta Convention mana time te janaide thakise.
Etu khobor Amit Shah pora janaidiya toh kedia 7 jun Rohingya Muslims kan ke Mynamar desh te bataidiya bejete janaidiya laga ase. Etu Convention mana time te tai bi BJP Sorkar kan nesena boila Manmohan Singh Sorkar pora eneka kam kuranai koi kena janaide thakise. Huilebi edia PM Modi laga Sorkar bitorte ami kan desh kan Pakistan aro tusera desh laga nahua manu kan ke thik pora husir laga kotha manabole kuri ase koi kena janaide thakise.
Tai bi PM Modi laga Sorkar 4 sal majutte 600 atankwatti kan muraide kena ase aro Naxalites kan 300 jun muraide kena ase. Aro etu hisabte ami kan desh edia toh ekdam kathara huijai ase koi kena janaide thakise.
BJP Chief Amit Shah bi Scheduled Castes nemite Bikaner jaka te Convention mana time te kotha kurikena kedia election punjibo Congress Party kan khali BR Ambedkar kehi yaat kuri. Huilebi kedia tai kan (Congress Party) election chetibo BR Ambedkar ke bahuri jai koi kena janaide thakise. Tai bi Congress Party kan 4 ta Generation hisabte ami kan desh te Sorkar julai kena thakise. Huilebi Dalits, Tribals aro Backward manu kan nemite toh kedia bi kanoon hisabte thik pora saidebole nakuri. Huilebi PM Modi laga bitorte toh ami kan desh laga sob Community toh ekta hisabte hi sai. Aro PM Modi laga bitorte bi ekta kotha “Sabka Saath, Sabka Vikas” koi kena ulai kena sob manu ke eke pora ahkete luijabole kuri ase koi kena janaise.
Add Comment