Assam:Delhi HC para activist Devangana Kalita ke bail junaishe

June 15, 2021. Tuesday din Delhi High Court para activist Devangana Kalita logot bail thishe. Tai ke February 2020 saal northeast Delhi te ekta violence case nemite thurikena thakishe. High Court para aro tui(2) jun activists Natasha Narwal aro Asif Iqbal Tanha ke be etu heke case nemite bail thishe. Devangana toh Assam state laga manuh ase aro tai oper te Delhi riots case te Unlawful Activities (Prevention) Act (UAPA) pithor te thurikena thakishe. Etu tin(3) jun manuh ke toh division bench Justices Sidharth Mridul aro Anup Jairam Bhambhani, Delhi High Court para Tuesday din bail junaishe. Etu bail toh personal bond Rs 50,000 aro tui(2) local sureties te janaishe, koikena khobor toh media para koishe. Bail laga conditions hesab te, etu tin(3) manuh para tai khan laga passports toh surrender koribo aro etu case beya nahobo nemite kam dosura nakoribo. Devangana Kalita aro Narwal toh women’s rights group Pinjra Tod Collective laga members ase aro Tanha toh Jamia Millia Islamia University te student ase. Narwal aro Devangana  Kalita toh Jawaharlal Nehru University (JNU) te PhD scholars ase aro Pinjra Tod
Collective te samil ase. Tai khan toh May 2020 saal para police laga hath te thkishe aro olop din akhe Narwal ke toh tai laga papa mora nemite bahar te olaikena ase. Delhi Police para Delhi riots conspiracy case nemite FIR (59/2020) deya te sob melaikena 15 manuh pithor te Kalita, Tanha aro Narwal samil hoikena ase. Delhi Police para koishe ke, Tanha para Citizenship Amendment Act (CAA) kelaaf te protest thaka samai besi tangor kam korishe. January 2021 saal New Delhi te Delhi riots case te Devangana Kalita laga bail toh rejected korishe. January moina Delhi Court para bail application reject korikena tai laga prima facie hesab te anti-terror law pithor te jaishe. Devangana Kalita ke Delhi riots cases te besi besi kam kora nemite thurishe koishe. February 24, 2020 saal te CAA supporters aro protesters pithor te tangor jamila olaikena komti hoilebi 53 manuh morishe aro 200 oper manuh khan jokom paishe koishe.