Senior Odisha IPS Officer morishe

Bhubaneswar: Odisha Police laga Senior IPS officer aro Director Vigilance, Debasis Panigrahi ke COVID-19 bemar hoikena Kolkata te private hospital ekta para morishe, tai laga umer toh 55 thakishe, koikena ghor manuh khan para janaishe. Mr Panigarhi toh 1991 batch IPS officer ase aro tai para jarikena jowa toh tai laga maiki, chokra aro chori ase. June 8 darik te tai ke Kolkata private hospital ekta te airlifted hoikena jaishe, hoilebi tai toh Friday rathi 10:15 Pm te morishe, koikena khobor para janaishe. June moina laga 1^st hafta te tuita(2) vaccine dose be loishe, hoilebi tai logot coronavirus positive tested thurishe aro tai toh ghor te isolation te bohi thakishe. Tai laga halat beya howa nemite, Cuttack Ashwini Covid Hospital te admitted korishe aro ventilator support te thakishe. Olop din thaka beche, June 8 darik te laga halat beya howa nemite Kolkata te airlifted jaishe. Tai toh ECMO support te thakishe aro tai oper te serious pneumonia thurishe, etu oper te tai toh dosura comorbidities bemar be thakishe koishe. Mr Panigrahi toh writer be thakishe aro tai para Odia Sahitya Akademi award be jetishe, olop din akhe te tai para bemari oper te book be lekikena ase. Mr Panigrahi mora khobor honikena manuh alag-laga khan para mon duhk kotha junaishe. Odisha Chief Minister Naveen Patnaik para tai laga Twitter handle te IPS officer mora nemite mon dukh kotha janaishe. “senior IPS officer Shri Debasis Panigrahi mora khobor honikena besi mon bekaishe. Tai toh besi experienced, able police administrator aro prolific writer thakishe. Ami laga bapana aro parthana toh tai laga ghor manuh aro sathi khan logot janai ase. Om Shanti,”  koikena Mr Patnaik para janaishe. Union Minister Dharmendra Pradhan para be koishe ke, “senior IPS Officer and Vigilance Director Debasis Panigrahi mori-jowa khobor honikena besi mon duhk ase. Tai para alag-alag important positions neshina- IPS officer aro Odisha te kam korishe. Ami laga mon duhk kotha toh itya duhk samai ghor manuh logot janai ase.”