Headlines

Space Education Centre, Nagaland laga

October 5, 2018

DIMAPUR, OCTOBER 5 : Space Education Centre (Planetarium) toh Nagaland Science Centre, Super Market, Dimapur laga bitorte ase. Etu Centre toh National Council of Science Museum Ministry of Culture, Government of India aro Department of Science aro Technology, Government of Nagaland pora banaidebole kurikena bana laga ase. Aro etu Centre toh Nagaland CM Shri Neiphiu Rio pora 28th September, 2018 te ami kan Nagaland state manu kan nemite ase koi kena janaidiya laga ase (dedicated) koise. Etubi Shri Mmhonlumo Kikon, Honourable Advisor, Science aro Technology Department, Government of Nagaland laga aro Smti Dellirose M. Sakhrie IAS Commissioner aro Secretary Department of Science aro Technology, Government of Nagaland laga kan bi thaka time te.

Nagaland Science Centre, Super Market, Dimapur laga toh 14th September 2004 sal te banai khotum hui kena kam julabole suru kura laga ase. Etubi National Council of Science Museum Ministry of Culture, Government of India aro Department of Science aro Technology, Government of Nagaland pora. Aro etu Nagaland Science Centre toh Ticket System pora jula laga ase. Etubi General Rs.10/ per head, Students (Teacher laga motub pora aha Students kan) Rs.5/ per head, 3D show duration nemite 20 minutes hisabte General fee Rs.30/ per head aro Student group kan teacher laga motub pora aha kan Rs.10/ per head mange ase koise.

Etu Nagaland Science Centre toh ami kan Nagaland te ekta bhal wala ase. Aro etu Centre te Students kan ahe kena ki-ki kan sob shekibole bari aro kam julabole bari. Huilebi State Sorkar kan Scientific Machinery system (saman aro hadiyar) kan nemite bhal te sabole nakurikena thaka aro bhal te ahkete luijabole nakura karne etu Centre toh pura-puri nahua huijaise aro kam bhal te najula huikena thakise koise. Huilebi etu Centre kam najulai kena thaka pora khobor te janaidiya bejete pora toh arobi kam julabole suru huise. Huilebi etu dak bi thik te nai koise. Etu karne General aro Students kan ke kushibole tickets mange thaka pora ulta Department of Science aro Technology, Government of Nagaland kan etu Centre kan laga Hadiyar aro saman kan thik pora nathaka nemite sabole babuna kurile bhal hobo koi kena, khobor hisabte janaise.