Sumi Ki Foundation Stone lakaidese
DIMAPUR, OCTOBER 6 : Sumi Ki laga Foundation Stone toh October 6, 2018 te MP Lok Sabha, Tokheho Yepthomi pora lakaidese. Etubi Chekiye Bosti te etu Sumi Ki banabole kura Committee members aro leaders etu Western Sumi Hoho laga Frontal Organisation laga kanbi thaka time te.
Etu lakaidiya bejete katha Programme bi thakise. Etu time te MP pora sob Western Sumi Leaders aro public kan ke etu Project bhal te banai kena khotum kuridebole karne mon melekena motub kuribole kuribi koi kena janaide thakise.
Etu din te kotha kurikena MP Tokheho porabi ekjun-ekjun ke kam kuribole kuribi koi kena janaide thaka pora ulta sob manu eke pora mon melekena etu Project (Building) nemite kam kuribole kuribi aro bhal te chulti pora banai khotum kuridebole kuribi koi kena janaise. Tai bi etu khor pora khali aji-kali laga Leaders kan nemite hi nahui. Huilebi sob nemite aro ahebole laga manu kan nemite bhal kuridebole karne hi ase koi kena janaide thakise. Etu karne etu khor banabole kura toh khali poisa porahi banabole kura nahui. Huilebi ami kan sob physically, morally aro prathana te motub kuribole kuribo lagi koi kena etu MP pora janaide thakise.
Etu din te Sumi Ki banabole kura Committee Convener, K. Kakheho Yepthomi porabi ekjun-ekjun ke motub kurikena thakibole kuribi aro etu khor toh bhal te banabole kuribole kuribi koi kena janaide thakise.Tai bi secretary finance & LRD, Y. Kikheto Sema IAS aro MP Tokheho 2 jun ke etu khor banabole karne motub kura nemite besi khushi baa janaide thakise koise.
Etu din te bi Wecome Address toh Western Sumi Hoho President, Zheshito pora kuridese. Aro Er. Kasho Chishi, President, Sumi Officers’ Union Dimapur laga pora etu din laga Programme toh ahkete luijai kena manaidese koise.
Add Comment