Itanagar te July 12 para ek hafta pura lockdown janaishe

July 10, 2021. Itanagar Capital Complex deputy commissioner Talo Potom para janaishe ke, Covid-19 cases besi othi-thaka nemite district te pura lockdown toh July 12 darik para ek hafta nemite thakiboli janaishe. Complete lockdown koriboli approval nemite Itanagar Capital Complex deputy commissioner para Saturday din Arunachal Pradesh, chief secretary logot letter lekishe. Letter te DC par koishe ke, Itanager Capital Complex te Covid-19 cases besi hoikena jai thaka nemite July 9 darik 11.30 am te virtual meeting thakishe. Etu meeting samai district te stakeholders, MLA, corporators of IMC, ZPMs, health department, police, Arunachal Chamber of Commerce, representatives of e-Commerce/ home delivery services, market welfare associations, hawkers aro vendors association, transport meeting korishe. Itanagar Capital Complex DC para koishe ke, “record hesab te Covid-19 positive cases aro test kora positive rate toh complete lockdown June 7 darik te kula beche besi othishe”. “itya test positivity rate toh hafta neshina 10% te ase. Itanagar Capital Complex te wards/sectors jaga besi te Covid19 cases toh othikena ase etu nemite micro-containment zones ase koikena janaishe,” deputy commissioner para koishe. Deputy commissioner para aro koishe ke, “district administration aro police para Covid-19 hoshari neum toh janaikena ase hoilebi manuh khan para district administration aro police laga kotha namanikena ase”. DC aro koishe, “manuh khan para micro containment hokom aro Covid hoshari neum toh namana nemite bapana besi tangor ase”. “Itanager Capital te complete lockdown korile toh Covid-19 spread kora toh rokibo,’ koikena DC para koishe. “Itanagar Capital Complex te Covid-19 spread hoi thaka rokabo nemite July 12, 2021 para loikena ek hafa pura lockdown toh District Disaster Management Authority (DDMA) para manishe,” DC para leeter te janaishe. Deputy commissioner Potom para chief secretary logot etu letter toh manikena Itanager Capital Complex te July 12, 2021, 5 am para loikena ek hafta nemite lockdown thakiboli koishe.