July 12, 2021. Sunday din Arunachal Pradesh government para Itanagar te COVID bemar pheli thaka rokabo nemite total lockdown koriboli fesla loishe. Etu fesla toh Sunday din Itanagar laga Deputy Commissioner, Talo Potom para meeting samai janaishe. State government para aro fesla loishe ke, capital complex te pura lockdown toh COVID cases besi oth-thaka nemite July 20 darik dak othaboli fesla loikena khobor toh janaishe. State Chief Secretary Naresh Kumar para koishe ke, cabinet para Itanagar, Naharlagun, Nirjuly, aro Banderdewa jaga te lockdown toh aro othaishe koishe. Tai para aro koishe ke, lockdown hodhari neum toh akhe te bonaikena thaka toh putli nakoribo hoilebi capital complex te konuba neum putli koriboli janaishe. Colonies pithor te Grocery shops toh 5 am para 9 pm dak kula thakibo, hoilebi, essential saman boha gari toh capital region Banderdewa check gate te ahiboli thibo koishe. Kam nathaka public gari toh peraboli mana ase. Medical emergencies nemite capital deputy commissioner office para permit thakiboli lage koishe. Commercial aro private establishments toh bondh thakibo, hoilebi, manufacturing industries te minimum staff thakina kam koriboli koishe aro dosura private kam neshina banks, health facilities, press, pharmacies, telecommunication, internet services, broadcasting, aro cable services nemite te be kula thakina kam koriboli manishe. Hospitality establishments neshina toh bondh thakibo aro quarantine facilities toh kula thakibo. Sob religious jaga bondh thakibo aro manuh mora jaga te 20 jun manuh oper jama nakoribo koishe. Finance department aro deputy chief minister laga office toh kula thakibo koishe.
Arunachal te COVID lockdown July 20 dak othaishe
