July 12, 2021. Sunday din Arunachal Pradesh laga Pasigaht judicial jail te bohi thaka 7 jun toh jail para pulaikena jaishe koishe. Etu 7 jun kaun khan pulaishe, tia khan sob toh trial prisoners puithor te thaka ase koishe. Etu ‘Great Escape’ toh 6:30 te khana thiboli lock-ups kula samai pulaishe koishe. Pulai jowa prisoners khan laga nam toh Abhijit Gogoi, Taro Hamam, Kalom Apang, Talum Panying, Subash Mondal, Raja Tayeng aro Dani Gamlin ase koishe. Etu manuh khan ke khana thiboli samai guards logot hamala korikena pulaishe koishe. Etu manuh khan para guards oper te chili aro pepper powder lakaishe koishe aro etu samai 5 ju guards ke jokom korikena pulaishe koishe.Etu hamala kora te Head Constable Rajesh Lego toh matha te besi beya para jokom paishe koishe. Dosura guards kaun jokom paishe tai khan laga nam toh RK Kambhari, O Taying, Tago Tatung aro Tapi Tali ase koishe. Etu samai, Arunachal Pradesh te Pasighat Police para pulai jowa manuh khan ke thuriboli pesari thakishe koishe. Police para IRBn jawan khan para Pasighat exit points te pesarishe. Deputy Superintendent of Pasighat Police – Tapang Tatak para koishe ke etu pulai jowa jail manuh khan toh joldi para aro thuribo janaishe.
Pasighat jail para 7 prisoners puilai-jaishe
