July 14, 2021. Assam te 24 gonda pithor te 2169 notun positive cases aro 23 mora khobor paishe koikena khobor para janaishe. Etu khobor toh Assam chief minister Himanta Biswa Sarma para janai thishe aro etu notun cases toh 1,24,381 tests kora te thura ase koishe. Itya State te sob melaikena positive percentage toh 1.74% te ase. Etu notun cases pithor te, Kamrup Metro district te 258 cases registered hoikena ase. Etu samai Covid-19 bemar para 23 jun morishe aro dosura 100 manuh neshina bemar bhal hoishe. State laga Covid-19 recovery rate toh 95.07% hoikena ase Tuesday din Prime Minister Narendra Modi para Northeast te COVID-19 halat saikena besi bapana tangor koriboli janaishe. PM Modi para Northeast states laga sob chief ministers khan logot COVID-19 halat nemite meeting thakishe. Etu oper te konuba Northeast states te COVID-19 halat toh besi beya jai ase koishe. Etu samai PM Modi para aro koishe ke, desh laga konuba jaga te COVID-19 halat toh olop din akhe bhal hoikena ase etu nemite Northeast te be bemari halat toh saboli janaishe. PM Modi para koishe ke, bemari toh jodi te thuribo nemite testing besi koriboli janaishe. Modi para high vaccination, minimal vaccine wastage, adopting micro-containment zones te COVID logot larai kora samai COVID hoshari neum manikena kam koriboli koishe. Northeast states te virus variants sai thakibo nemite PM Modi para aro states jaga te jowa samai alag experiences loikena bemari logot larai koriboli koishe. “experts khan para itya mutations aro variants toh study kori ase koikena PM Narendra Modi para etu khobor toh janaishe aro COVID-19 bemar para thur thakibo nemite hoshari kam toh aro kara wala bonaboli janaishe. Hill stations te manuh khan para mask nalakai nai jama kora nemite besi tangor bapana ase,’ koikena Prime Minister para janishe.
NE CMs, khan logot kotha kora samai PM Narendra Modi para CM Himanta Biswa Sarma logot COVID-19 bemari toh micro-containment te pura lockdown nakora nemite kushi powa janaishe.
