Kerala te Zika virus cases 38 te othishe

July 21, 2021. Tuesday din Kerala te Zika virus toh aro ekta khobor paishe, etu melaikena mosquito-borne bemari toh state te 38 cases hoikena ase koishe. Press conference te kotha kora samai, Kerala Health Minister Veena George para koishe ke, state te aro ek jun manuh logot Zika virus bemari toh thurishe. “49 umer maiki ek jun Kulathur, Thiruvananthapuram te Zika virus bemar toh thurishe. Etu virus toh virology lab of Thiruvananthapuram Medical College te test kora beche khobor toh paishe”, koikena health minister para etu khobor toh janaishe. Etu melaikena itya state te 38 manuh logot Zika virus bemar thurikena ase. Itya dak te 8 active cases aro, hoile etu bemar manuh khan laga halat toh besi bhal te ase, koikena Ministry para aro khobor toh janaishe. Jowa kali, tui(2) manuh logot Zika virus bemar toh thurishe, etu me meliakena Kerala te mosquito-borne virus bemar toh 37 manuh logot ase, koikena state health minister Veena George para koishe. Press conference te kotha kora samai, George para manuh khan logot janaishe ke, 41 umer maiki ek jun Kattaikonam, Thiruvananthapuram para aro doctor ek jun 31 umer, Kumarapuram para virus bemar toh thurishe. July 15 darik te, Kerala te 5 jun manuh logot Zika virus bemar toh thurishe, etu melaikena state te cases toh 28 te othikena ase. Etu notun 5 cases pithor te, tuita(2) cases toh Anayara jaga para ase aro Kunnukuzhi, Pattom aro East Fort para ekta-ekta cases ase koishe. Mosquito-borne bemari toh komti koriboli kam kora samai, Thiruvananthapuram Municipal Corporation aro dosura district administrations khan para hoshari kam besi tangor korikena jai ase koishe.