Parganas te diarrhoea bemar para 78 hospitalised

September 8, 2021: West Bengal te North 24 Parganas district laga osor Kamarhati jaga te 78 manuh pithor te 5 jun bacha diarrhoea bemar hoikena hospitalised hoishe, koikena health department officials para khobor toh janaishe. Tuita(2) buri manuh etu bemar para morikena ase, hoilebi Deputy Health Secretary, Ajay Chakrabarty para koishe ke, tai khan mora toh diarrhoeal bemar para morai nahoikena renal failure nemite ase koishe. College of Medicine and Sagore Dutta Hospital te 78 hospitalised manuh majot te 6 jun bemari manuh laga halat toh besi serious te ase, koikena hospital authorities para janaishe. Kamarhati Municipality te Wards 1, 2, 3, 4, aro 5 te bemari manuh khan ke diarrhoea bemar para hospitalised hoikena ase. “Monday rati te komti hoilebi 9 jun ke hopsital te loikena ahishe. Aro aji be etu eke bemar para manuh besi admitted hoikena ase. Ami khan laga suspect hesab te paani nemite hobo pareh,” koikena College of Medicine & Sagore Dutta Hospital laga official para janaishe. Kamarhati Municipality coordinator Gopal Saha logot khobor loikena tai para paani naka akhe te paani toh boil kooriboli janaishe. “etu bemar toh paani nemite ase, etu nemite ami khan para etu jaga te paani supply thiboli nemite paani tanks arranged korishe. Panni laga samples toh examination nemite putaishe aro etu jaga te manuh khan logot hoshari thakiboli janai ase,” koikena Saha para koishe.