NEW DELHI, OCTOBER 13 : Union Minister MJ Akbar toh Nigeria desh te thaka India desh te aji pujutte wabas ahese. Kele tai ke besi jun maiki Journalists kan pora Sex chamala nemite anede kena thakise. Etubi tai Newspaper Editor nemite kam kuri thaka time te Sex kura laga chamala nemite. Aro etu nemite Minister kam pora ulaijabole aro hatijabole kuribi koi kena kotha ula huise. Etu karne tai India desh te wabas aha huise.
Etu maiki Journalists kan laga kotha ke juwab de kena Delhi Airport te tai bi etu chamala karne tai sob khobor kan toh bejete hi janaidebo koi kena janaide thakise koise. Aro tai ke Minister kam pora hatijabole kotha ula karne toh husa kebi hatijabole ase na nai najani. Aro etu chamala nemite Prime Minister Narendra Modi pora hi saidebole kuribo nesena ase koise.
Etu MJ Akbar ke sex chamala nemite asul te aro ahkete kotha ula toh Priya Ramani koi kena Journalist pora Twitter te pora October darek 8 te janaidese. Etu bejete hi tusera maiki Journalists kan bi asti pora moi kebi (#MeToo) koi kena kotha ula huise koise. Etu maiki kan toh Prerna Singh Bindra, Ghazala Wahab, Shutapa Paul, Anju Bharti, Suparna Sharma, Shuma Raha, Malini Bhupta, Kanika Gahlout, Kadambari M Wade, Majlie de Puy Kamp kan ase koise.
Etu chamala nemite BJP kan eman hala kurikena thaka nai. Huilebi kunoba Ministers kan pora khilaf kurikena thakise. Etu ke Union Minister Women aro Child Development Maneka Gandhi aro Union Minister of State for Social Justice aro Empowerment Ramdas Athawale 2 jun porabi etu Minister MJ Akbar toh kam pora hatijabole lagi koi kena janaise koise. Etu oporte alak-alak Political Parties kan kobi Congress, Communist Party of India (Marxist) aro All India Majlis-e-Ittehadul Muslimeen kan pora hatijabi koi kena ulai thakise koise.
Add Comment