Assam te 2 NLFB militants morishe, ASP jokom

April 7, 2022: Assam police logot larai kora samai komti hoilebi tuita(2) former National Liberation Front of Bodoland (NLFB) militants toh etu larai te morishe, koikena khobor para janaishe. Etu former NLFB militants tui(2) jun toh dacoity te samil thaka Tuesday din Assam Chirang district te police logot larai kora samai morishe. Additional superintendent of police (ASP) aro tai laga bodyguard logot be larai kora samai jokom paishe. March 29 darik te etu tuita(2) mora former NLFB militants toh India-Bhutan border osor tinta(2) bosti te dacoities kam kora te samil thaka ase. Monday din Runikhata jaga te former NLFB militants khan thaka khobor powa nemite Assam police para operation soruh korishe. Etu suspected dacoits khan toh ghor ekta te lokai-thaka samai, Tuesday din te tai khan para police team oper te goole jolaishe. Police team para be wabas jawab deya te etu tuita(2) dacoits toh morishe. Additional SP (Headquarters) Prakash Medhi aro tai laga bodyguard logot be jokom paishe, koikena police para khobor toh janaishe. Etu samai, 2-3 jun manuh ghor pithor te thaka khan toh pulai-jaishe koishe. Police para etu manuh khan ke thuriboli search operation kori thakishe. Dosura khobor ekta te, ASP Prakash Medhi laga right-hath te goole lakishe aro tai laga bodyguard logot be jokom powa nemite, Gauhati Medical College Hospital (GMCH) te elaj nemie loikena jaishe. “Additional SP Prakash Medhi para tangor kam korishe, tai jokom hoile be, tai aro team para tuita(2) criminals logot larai korikena moraishe,” koikena special director general of police (Law and Order) GP Singh  para khobor toh janaishe.