Manipur : All Bazar Community and Traders para sit-in protest rakhisey

Imphal, July 28 : All Bazar Community and Traders para July 28 te Imphal West laga Thangal Bazar te ekta sit-in protest rakhisey. Taikhan para Manipur te shanti aro milijulikina thaka laga halat tu joldi wapas anidibole demand kurisey. Etu protest te Manipur te boha  bisi non-Manipuri manu aro beypari khan ke dikhisey kun khan tu Sikh aro Jain ke milaikina alag alag jati laga asey. Taikhan sob para Manipur te shanti nimitey taikhan laga awas uthabole  haath milaisey.

Etu buhikina pradarshan kora tu Coordinating Committee on Manipur Integrity (COCOMI) logotey milikina organize kora laga asey.  Etu protest para ekta safa message disey ki Manipur te etya chuli thaka jhamila ke tu khali larayi nukurikina ekjun ekjun logotey mila mili kurikina  hey thik kuribole paribo. Kuntu nimitey tu  lasting huwa laga shanti thakibo lagey.

Dolly Jain, koikina ekjun josh te thaka protest kora manu para protest kuri thaka homoitey media ke jawab disey. Tai para jor lagaikina koisey ki shanti aro ekjun ekjun logotey milijulikina thaka laga demand tu jaati, dhormic biswas aro community para bi barikina  asey. Tai para Manipur nisna sundur rajya te lamba homoi para para shanti nathaka laga opor te dukh jataisey.  Tai para sob manau ke ekey logey ahibole aro shanti aro khusi nimitey prathana kurikina rajya te halat tu wapas normal te anibole dhyan dibole request kurisey.

Etu protest te bhag luwa aro ejun manu para enaka koisey, “ Manipur logotey dangor potential(dangor hobole laga sambhavna)  asey aro etu tu duniya te ekta top seher hobo paribo. Hoilebi etu potential ke khulibole  nimitey amikhan ke ekta normal aro milijulikina thaka laga mohol lagey. Agey baribole laga rasta tu shanti hey asey aro etu shanti tu pabole nimitey samaj laga sob manu khan kaam kuribo lagey.

Protest kora manu khan para shaktishali placard dikhaikina taikhan laga message  disey. Etu placard khan te enaka likhikina thakisey, “Education ke bachabi,” “Nirdos manu khan ke mora tu bon kuribi,” “Amikhan ke larayi jhagra nalagey”, aro “Pahori jabi aro maaf kuridibi”-“Amikhan sob tu bhai aro bhuini khan asey.” Etu message khan para sob manu laga   larayi jhagra ke kothom kuribole  aro Manipur ke ekta shanty aro kamyab jaga banabole laga iccha nimitey ekta nutun suruwat kuribole laga iccha tu dikhai asey.