Imphal, July 16 : Manipur laga rajya te etya chuli tahka larayi jhagra para kheti bari laga sector ke ekdam biya para affect kurisey. Kilemaney kheti bari kora manu khan tu etya bi hathyar dhurikina thaka badmash khan para hamla hobole laga bhoi te thaki asey.
Rajya laga kunba khatra thaka jaga khan te bisi kheti bari kora matti tu dhan khan nalagaikina muri jai asey. Aha saal tak te 1543.23 metric tones maan chawl loss hobole nisna hisap olai asey. Hoilebi halat bhal thaka mohol te kheti laga kaam suru kuribole karney rajya laga sarkar para pura kosis kuri asey taki rajya te ahibole homoi te kha luwa laga eku diktar nathakibo.
Director of Agriculture, Ningthoujam Gojendro para India Today NE ke koisey ki etya chuli thaka jhamila nimitey kheti bari laga sector tu bisi biya para affect hoisey. Manipur te chawl ugabole para laga matti tu pura puri 195000 hectares asey. Etu te department para survey kora hisap te 5127 hectares matti tu June tak eku dhan khan nalagaikina thakisey. Poisa laga kimat hisap te pura puri loss huwa tu Rs 39 crore nisna ekey asey.
Tai para koisey ki June tak te 5127 hectare matti tu kheti kuribole nimitey nocholaikina asey. Aro judi taikhan para etu matti ke olop bi chawl ugabole nocholaisey koiley Manipur te aha saal 1543.23 metric tones laga chawl loss huwa tu dikhibo. Aro etu quantity ke poisa laga kimat te bodli kurisey koiley Rs 39 crore maan hobo.
Tai para agey barikina koisey ki bisi district laga busti fale thaka area ke kheti bari kuribole nimitey cholabole paranai. Pura puri affect huwa nohoilebi dhan aro gutti khan nalagaikina thaka 5127 hectare mati majotey Bishnupur district tu sobsey bisi effect hoisey aro Jiribam tu sobsey komti affect hoisey.
Tai para Manipur te ahibole din te kha luwa laga eku diktar na pabo koikina biswas thaka tu janaikina koisey ki etu loss huwa tu kom kuribole nimitey bisi alag alag upai kuri asey. Khatra thaka area khan te kheti bari wapas suru kuribole dibo nimitey security disey, bisi kisan khan ke bisi fasal ola gutti khan bhak kurisey aro urea fertilizer(chawl ugabole modod kora fertilizer) tu eku diktar nathakikina joldi available hoijabo koisey.
Tai para agey barikina koisey ki fertilizer khan misa misa bhag nohobole nimitey sarkar para computer generated standard operating procedure lagu kurisey.
Tai para enaka koisey “Amikhan para urea bhag kuribole nimitey ekta SoP issue kurisey. Kisan khan para district agriculture office te ahikina etu urea fertilizer khan lobo parey. Kun kisan khan para urea fertilizer paisey taikhan para taikhan laga naam tu system te dhalibo taki tatey eku duplicate laga mamla naolabo.” Tai para sob kisan khan ke fertilizer khan ke bhoi khaikina nikinibole aro fertilizer khan ke dhyan para cholabole koisey.
Add Comment