Business and Health

Mukesh Ambani tu India laga sobsey amir manu hoisey

October 11, 2023
New Delhi, October 10 :  Tuesday(October 10) te ekta report release huwa hisap te, 2023 te  Rs 8.08 trillion laga total dhon thakikina, Mukesh Ambani para India laga sobsey amir billionaire laga title wapas hasil kurisey. Reliance Industries laga chairman aro managing director Mukesh Ambani  laga dhon tu Adani group laga chairman aro malik Gautam Adani laga dhon ke paar kurisey. Juwa saal Gautam Adani para India laga sobsey amir manu laga title dhurisiley. Etu saal te Ambani laga dhon 2% para barisey.
260 ONE Wealth Hurun India Rich List 2023 laga hisap te, last time duniya laga sobsey amir manu laga list release huwa picheyte Adani laga dhon 57% para girikina Rs 4.74 trillion hoijaisey. Etu tu mainly January moina te Adani Group laga khilaf te Hindenburg report ola nimitey asey. 2022 te Adani laga dhon  tu Ambani para Rs 3 trillion bisi thakisey. Etu saal, Ambani laga dhon Adani para Rs 3.3 trillion bisi hoijaisey.
Adani laga dhor komti hoija laga mamla ke comment kurikina etu report para koisey, “Etu tu Hurun India Rich List suru huwa homoi para etya tak te sobsey bisi dhon komtu huwa dikhai asey.” Etu list te sobsey first 2012 te olaisiley. 2023 te Adani laga dhon bisi komti hoija laga bawajut bi juwa 5 saal te sobsey amir Indian majotey Adani tu sobsey bisi profit pa company thaki asey.  Report hisap te  Adani laga dhon tu 2019 te thaka Rs 94,500 para 5 guna bisi hoisey.
Moja laga kotha tu etu asey ki etu list te thaka India laga top 10 sobsey amir billionaire majotey 2023 te 8jun manu laga dhon barisey. 10 jun majotey khali duijun, Adani aro Radhakishan Damani laga dhon girisey. Radhakishan Damani laga dhon tu Rs 1.43 trillion para girisey.
Ambani aro Adani picheyte Serum Institute of India laga managing director Cyrus Poonawalla laga Rs 2.78 trillion dhon thakikina India laga sobsey amir manu laga list te 3rd te thaksiey. Etu picheyteHCL Technologies laga malik aro chairman Shiv Nadar laga Rs 2.28 trillion dhon thakikina  4th position te thakisey , 5th te Hinduja Group laga Gopichand Hinduja thakisey kun laga Rs 1.76 trillion thakisey.
Etu saal Byju laga malik Raveendran tu etu list te ahibole paranai. 2022 te tai tu etu list te 49th rank te thakisey aro tailaga utu saal laga total kamayi Rs 30,600 crore thakisey.