Kochi, October 29 : Sunday (October 29) laga phujur te Kerala laga Ernakulam te thaka Kalamassery koikina ekta jaga te Christian group laga ekta convention centre te bomb blast hoisey kuntu te ekjun maiki murisey aro 40 opor manu jokhom khaisey.
Etu bomb blast tu Jehovah’s Witness koikina ekta Christian group laga prayer meeting chuli thaka homoitey hoisey. Top police official kuntu te Kerala laga ATS bi shamil asey taikhan bi etu blast huwa jag ate pungchisey. Bomb blast huwa laga karon tu janibole baki asey.
Ekjun police official para koisey ki taikhan ke phujur laga 9 am fale etu bomb blast hoisey koikina ekta call ahisey.
Kerala laga Chief Minister para etu ghotna tu ekdam monduk laga asey koisey aro koisey ki tailaga government para etu ghotna laga details( jankari) jama kuri asey.
Etu Chief Minister para koisey, “Etu tu ekta bisi monduk laga ghotna asey. Amikhan para etu ghotna laga details jama kuri asey. Sob top official khan Ernakulam te asey. DGP bi etu jaga te jai asey. Amikhan para etu mamla ke bisi serious para loi asey. Ami para DGP ke kotha kurisey. Amikhan para investigation kora picheyte aro bisi details janibole baki asey.”
Kerala Industries Minister P Rajeev para koisey ki etu bomb blast huwa laga jaga manu khan ke gusibole nidibole nimitey rusi para block kurikina asey aro police aro jui ke bujha laga team ke kaam te lagaidisey.
Kerala Health Minister Veena George para bi etu ghotna huwa picheyte sob government healthcare professional (ilaj kora doctor, nurse khan) ke tatey duty nimitey pungchibole koisey.
Add Comment