India, 31 October : Olympic aro world champion javelin thrower Neeraj Chopra, Tuesday dey janai dishey ki tai laga sobse bhaal toh aro ahiwoley asey aro kuishey ki tai laga elusive 90m mark toh ahia saal breach kuribo parey juti tai improvement kuriley tai laga technique dey, bishi pak leg-blocking dey. Chopra toh world champion itu saal agey dey huishey, tai laga historic gold dey halina Tokyo Olympics dey, aro tai laga Asian Games title defend kurishey Hangzhou dey. “Mui itu thik para janai diwo muun asey ki mui laga sobse bhaal toh aro ahiboley asey. Lamba time karney ekta competition dey mui nijor laga sobse bhaal kurishey nahuiley sobse bhaal osor dey kurishey kuina lagianai,” itu 25-saal Chopra kuishey ekta promotional event dey.
“6 cm toh pawoley pachina asey. Stockholm Diamond League dey 89.94m thakishey (June 2022 dey). Utu time dey mui line laga olob piche dey thakishey. Juti mui laga javelin mui olob agey jaina philaina thakiley, 90m huwoley thakishey,” kuishey Chopra itu event dey tai laga association ke janai dina top supplements brand ‘Optimum Nutrition logot’.
Tai laga top-class flexibility aro haat laga speed para taike Olympic aro world champion panaishey huilewi Chopra toh tai laga theng block kuria technique toh perfect kuribo muun asey.
“Mui laga coach hotai kui ki itu toh 60 per cent theng asey aro 40 per cent upar podon asey. Toh theng laga kaam toh bishi important asey. Mui laga theng kaam dey bishi improvement khan kuriwoley lagi asey,” kuishey itu superstar javelin thrower.
