Thiruvanathapuram, November 2 : Kerala laga government tu governor para public welfare nimitey thaka 8ta bill ke clear kuribole mana kora laga against te Supreme Court te jaisey aro lgalog etu bill khan ke clear kuridibole laga order mangisey. Kerala laga government para koisey ki governor tu dui saal opor para etu 8ta bill majotey 3ta bill te buhi asey.
Etu hapta te etu mamla nimitey court te ja rajya majotey Kerala tu 3rd asey. October 28 te Punjab government para court te jaikina 7ta bill ke clear kuridibole mang kurisey aro Tamil Nadu tu October 31 te 12 bill te monjuri dibole aro appointment, sajai diya laga jurmana aro jail te boha kaidi khan ke homoi nupungcha ageyte reha kuridiya logotey jurikina thaka files ke sign kora te monjuri pabole nimitey Supreme court te jaisey.
Advocate CK Sasi laga through para plea file kora te, Kerala laga sarkar para koisey ki governor Arif Mohammed Khan laga harkat para constitution laga nyom ke harabole aro olta polta kuridibole dhomki di asey.
Constitution(likhikina thaka nyom aro kanoon) laga Article 200 under te etu bill khan nimitey governor laga monjuri lagey. April moina te, etu court para article te thaka expression “as soon as possible” (kiman joldi parey eman joldi kuribole lagiya) matlab etu asey ki etu bill khan ke aro delay nukurikina joldi clear kuridibo lagey.
Court para Telangana government para governor laga against te bill clear kuribole diri kora nimitey Supreme Court te plea kora te hearing (sunuwahi) kra homoitey koisey, “Etu urgency tu olop hapta aro etu para bisi nohobo lageyy. Kilemaney rajya laga nyom aro kanoon bana manu para taikhan laga elect kurikina thaka representative para akhir kar etu faisla loisey ki etu bill khan ke kiman joldi parey eman joldi bill khan ke kanoon te bodli kuribole nimitey public laga monjuri bi lagibo.”
Add Comment