PM Modi para koisey ki India ke top 3 economies majotey loijabo

Damoh, November 8 : Prime Minister Narendra Modi para Wednesday (November 8) te koisey ki tai aro 3^rd baar  India laga Prime Minister hoisey koiley tai para India ke duniya laga top 3 economies majotey pungchaidibo.

Madhya Pradesh laga Damoh town te November 17 te rajya laga assembly election hobole ageyte ekta public meeting te kotha kora homoitey, Modi para etu bi koisey ki tai tu corruption(poisa kha) laga khilaf te larayi kuribole continue kuribo.

Tai para koisey, manu khan para Chhattisgarh aro Rajasthan te Congress  ke power disey hoilebi taikhan laga Chief Minister khan tu “satta” (baji khela) te aro black money kama te shamil thaka paisey.

Modi para koisey ki 2014 picheyte, India laga economy tu 10^th para uthikina 5^th te hoijaisey. Aro enaka kurikina India te 200 saal para opor raaj kurithaka desh, UK ke pichey charidisey.

PM Modi para enaka koisey, “2014 te, jitya amikhan power te ahisey, desh laga economy tu 10^th position te thakisey. Hoilebi astey astey para desh laga economy tu 9^th, 8^th, 7^th aro 6^th te jaisey hoilebi kun manu para bi etu laga kotha kuri thakanai. Jitya economy tu 5^th position te pungchikina UK ke pichey charidisey sob manu bi asurit hoikina India ke sabole suru hoisey.”

Modi para koisey ki tai India laga Prime Minister hoikina thaka laga 3^rd tenure te tai para India laga economy ke duniya te top 3 majotey loijabo.

Lok Sabha laga election tu aha saal hobole asey.

PM Modi para koisey ki judi Congress wapas power te ahijaisey koiley etu party laga poila laga Prime Minister Rajiv Gandhi para ekbar kuwa nisna rajya khan te  “85% commission system” chulibo.

Poila laga Prime Minister Rajiv Gandhi para poila te koisiley ki Centre para release kora sob ek taka para khali 15 paise hey subidha pabole thaka manu khan logotey pungchey.