Imphal, November 8 : Manipur laga transport minister Khasim Vashum para dawa kurisey ki Manipur laga 4ta district Ukhrul, Chandel, Tamenglong aro Senapati te internet service tu joldi hi wapas chalu kuri dibo nohoilebi khuli dibo.
Ukhrul te huwa ekta function te kotha kora homoitey, Vashum para koisey ki Chandel, Tamenglong, Ukhrul aro Senapati district khan te mobile internet service tu aro wapas chola suru hobo.
Etu 4ta district bi Naga manu majority thaka laga district asey aro eman moina para Manipur te gondogol chuli thaka homoitey etu 4ta district tu affect huwanai.
Manipur laga etu minister para bayan aha tu Manipur High Court para Meitei-Kuki jati majotey larayi jhagra chuli thaka homoitey gondogol naola jaga khan te internet service khulidibole koikina ekta directive diya picheyte ahisey. Hoilebi, internet service tu kitya wapas khulibo nohoilebi kuntu jag ate khulibo etu yu janibole baki asey.
Chief Justice Siddharth Mridul aro Justice Golmei Gaipulshillu Kabui para issue kora ekta rder te rajya laga sarkar ke utu jaga khan te internet service khuli dibole koisey kotey Manipur te gondogol chuli thaka para eku asar huwanai.
Court para rajya laga sarkar ke takhan laga official website te mobile internet data service bon kuridiya logotey jurikina thaka sob order issue kora laga copy upload kuribole koisey. Etu mamla te next hearing tu November 9 te hobole asey.
All Naga Students Assosiation of Manipur (ANSAM) para gondogol naola jaga khan te internet service wapas khulidibole demand kuri thakisey.
Sunday din te November 8 tak internet ban baraidiya laga tarik tu expire(khotom) hobole asey.
September moina laga olop din ke charikina, Mnaipur te May 3 para internet ban hoikina thaki asey.
Add Comment