Aizawl, November 8 : Mizoram para Tuesday(November 7) te taikhan laga legislative Assembly laga sob 40 seat nimitey eku biya ghotna nohoikina voting kuribole parisey.
November 7 laga phujur fale bisi voter dikhisey aro 11 am tak te 49.2% voter khan para vote dhali thaisey aro 4 pm tak te etu number 76.53% te barijaisey.
Rati laga 9:05pm tak te total vote diya manu laga figure available thakanai, aro rajya laga election official khan para koisey ki 6ta vote diya station te voting tu bon hoikina thakanai. Chief Minister Zoramthanga para technical problem jhelisey jitya tai para phujur te Aizawl North II te thaka Ramhlun Venglai Primary School te first vote dibole kosis kurisey.
Tai para EVM thik se kaam nokora nimitey vote dibole naparikina thakisey. Hoilebi, tai para picheyte vote diya laga jag ate wapas ahisey aro vote dibole kamyab hoisey. Zoram People’s Movement laga candidate, Lalduhoma kun Zoramthanga laga main challenge asey tai para Tuesday din te vote diyanai kilemaney tai para etu din te tailaga jaga Serchhip te homoi bitaisey kuntu toh Aizawl para 90 km laga duri te asey. Tai tu Aizawl te vote dibole nimitey registered thakisey.
Add Comment