Agartala, November 9 : Tripura CPIM state committee secretary, Jitendra Chaudhury para Chief Minister Dr. Manik Saha ke ekjun chutu chukri laga murder case ke jaanch kuribole nimitey ekta Special Investigation Team (SIT) banabole request kurisey.
Chaudhury, kun ekta MLA bi asey, tai para ekta letter te etu koisey ki Dipashree Das koikina ekjun school ja chukri laga ek moina ageyte khoon hoijaisey.
Etu bhayanak hatsa tu South Tripura district laga Kalachhara, Subroom jaga te thaka Biplab Sen laga ghor bhitor te hoisey.
Etu jurum tu ‘Suddhikaran’ (kiba bustu ke pavitra banaidiya) laga bahana te eku golti kaam kora nohoi koikina justify kurisey kilemaney tai tu ekta dusra dhorom laga chokra logotey rishta te thakisey.
Homoi jai thaka laga bawajut bi Chaudhury para chinta jataisey ki police para etu maiki ke khoon kora nohoilebi sacchayi ke lukaikina rakha mujrim khan ke dhuribole nimitey eku kadam uthanai.
Agey barikina tai para etu bi janaisey ki nahi Tripura Women Commission laga Chairperson nahi etu commission laga member khan para etu mamla laga jankari lobole nimitey etu chukri laga parivar ke lok kuribole jaisey.
Hoilebi asurit para taikhan para etu chukri laga khoon kora mujrim Biplab Sen laga ghor ke visit kurisey, kotey eye witness khan para kuwa hisap te taikhan ke eman bhal para treat kurisey aro etu opor te taikhan ke khana bi khelaisey.
Chaudhury para etu point out kurisey ki maiki khan laga khilaf te anyay nohoilebi jurum kora logotey jurikina thaka jaga khan ke visit kora picheyte Commission khan para ekta statement issue kuribole nyom asey.
Hoilebi etu mamla te, Women’s Commission tu chup buhi asey.
Tai para etu bi janaisey ki Biplab Sen kun etu case te main suspect asey tai tu bisi bar Manubazar Police Station laga Officer-In-Charge logotey bon dorja laga meeting kurisey.
Etu chukri laga baba para Biplab Sen para taikey etu case tu court laga bahar te khotom kuridibole laga kosis te Rs 15 to 20 lakh poisa offer kora nimitey gali disey.
Etu chukri laga parivar para etu offer ke sidha reject kuridisey.
Etu mamla khan ke saikina, Chaudhury para Chief Minister ke ekta SIT khara kuribole request kurisey. Taki etu case te bhal para investigation kuribole paribo, Biplab Sen ke arrest kora para suru kurikina.
Add Comment