Imphal, Novemebr 9 : All Naga Students’ Association Manipur (ANSAM) para Manipur rajya ke paar kurikina ja National Highway te kitya khulibo etu najana indefinite bandh ke Thursday din te hatai disey.
Naga Legislator Forum, Awangbow Newmai, Manipur Water Resources minister convener para rajya laga sarkar laga side para ANSAM laga duita demand ke pura kuribole nimitey biswas dila picheyte etu highway block kora tu khuli disey.
Naga Students’ body, ANSAM para etu blockade tu November 3 laga shaam 6 pm para lagu kurisey aro alag demand khan laga majotey October 26, 2023 te rajya laga sarkar logotey Memorandum of Agreement laga hisap te mobile internet service ke wapas khulidibole laga demand bi thakisey.
ANSAM para koisey ki ANSAM, executive council, ANSAM laga unit aro Naga Legislature Forum laga representative khan laga emergency meeting kuntu tu Shelley Chara Memorial Hall, ANSAM Secretariat, Tahamzam (Senapati) te Thursday din te rakhisey etu para olop din nimitey ANSAM para National Highway block kora tu suspend kuribole laga faisla loisey.”
Etu bayan te koisey ki ANSAM para rajya laga kunba district te internet oadha khula laga process ke acknowledge kurisey.
Add Comment