Regional

Manipur gondogol : Centre para 5 saal nimitey 9ta Meitei ectremist group ke ban kurisey

November 14, 2023

Imphal, November 13 : Central government para Manipur laga 9ta maan extremist group ke 5 saal nimitey ban kuridisey.

Ministry of home affairs (MHA) para Monday (November 13) te 9ta Meitei extremist organization ke gairkanooni association asey koikina declare kurisey.

Manipur laga etu 9ta extremist group ke Unlawful Activities Prevention Act (UAPA) laga under te gair kanooni association declare kurisey.

Etu mamla te Ministry of Home Affairs para Monday (November 13) te ekta notification publish kurisey.

Etu notification laga hisap te, etu 9ta Meitei group ke India laga ekjut hoikina thaka aro maryada laga khilaf te thaka kaam khan te shamil huwa nimitey ban kuridisey.

Etu group khan ke gairkanooni association etu nimitey declare kurisey taki taikhan laga laga rajya ke desh para alag kuridibole, atangwadi kaam aro larayi jhagra laga kaam kore tu komti kuribole paribo.

Manipur para ban hobole thaka 9 Meitei group khan tu : the People’s Liberation Army (PLA) aro etu laga rajneetik wing, the Revolutionary People’s Front (RPF), the United National Liberation Front (UNLF) aro etu laga armed wng, the Manipur Peoples’ Army (MPA, the Peoples’ Revolutionary Party of Kangleipak (PREPAK) aro etu laga armed wing the ‘Red Army’, the Kangleipak Communist Party (KCP) aro etu laga armed wing kuntu ke ‘Red Army’ bi koi, the Kanglei Yaol Kanba Lup (KYKL), the Coordination Committee (CorCom) aro the Alliance for Socialist Unity Kangleipak (ASUK) aro etu laga chutu chutu group, wings aro front organizations khan asey.

Centre para etu bi janaisey ki etu organization khan para Manipur ke India para alag kurikina ekta idependent desh banabole aro etu kaam kuribole nimitey Manipur laga indigeneous manu khan ke encourage kuribole aim kuri asey.

Notification te agey barikina koisey, “ Taikhan para India laga sovereignity aro maan-maryada laga khilaf te kaam kora forces khan logotey chup chap para kaam kurikina desh laga khilaf te thaka kaam khan kuribo . Rajya laga manu khan ke moraidiya laga kaam kuribo aro police aro security force personnel khan ke target kuribo, international border para gairkanooni tarika para hathyar, barud khan anibo aro taikhan laga gairkanooni kama kuribole nimitey public khan laga haath para dhomki dikina bisi poisa collect kuribo.”