Chandigarh, November 14 : Taikhan laga nutun order te, Punjab aro Haryana High Court para etu faisla kurisey ki rasta te beraithaka lawaris janwar jaiseki kutta khan para manu khan ke attack kora laga mamla te, attack huwa manu khan ke compensation(jurmana) dibole laga pura zimidari tu sarkar laga hobo. Kutta kamora laga mamla te, court para koisey ki compensation tu komti hoilebi ekta kamora laga daat laga nishaan nimitey Rs 10,000 hobo (matlab compensation tu kutta laga daat laga kiman dagi asey etu hisap te pabo). Aro gao te mangso khan phatikina 0.2 cm gehra jokhom nimitey Rs 20,000 poisa pabo.
High court para koisey, “ Compensation terabole laga pura zimidari tu sarkar laga hobo aro sarkar para etu ekey poisa tu etu mamla nimitey zimidar thaka Agency nohoile manu khan laga haath para bi wasul kuribo parey. Etu court para kutta kamora case te ekjun manu para compensation(jurmana poisa) manga laga petition diya te jawab dithaka homoitey enaka koisey.
Taikhan laga order te, etu court para sarkar ke enaka case khan logotey deal kuribole nimitey ekta committee banabole laga direction bi disey. High Court para faisla huna homoitey koisey, “ Etu Committee te nijor District laga Deputy Commissioner committee laga Chairperson nisna thakibo aro etu member khan thakibo (a) Suoerintendent of Police/ Deputy Superintendent of Police (Traffic), (b) nijor area laga Sub Divisional Magistrate (c) District Transport Officer, (d) Chief Medical Officer laga Representative.”
India te malik nathaka aro lawaris rasta te berai thaka kutta laga khatra opor te debate(behes) ola tu Parag Desai koikina ekjun 49 years laga entrepreneur(company chola manu) murija picheyte asey. Parag Desai tu Wagh Bakri Tea Group laga executive director thakisey aro tai tu juwa moina te tailaga ghor bahar te rasta te beraithaka kutta khan para attack kora picheyte jokhom kha picheyte brain hemorrhage (brain para khoon ja) nimitey murijaisey.
Etu monduk laga ghotna huwa picheyte, kunba social media(instagram, X, facebook) chola manu khan para etu lawaris kutta khan laga problem ke thik kuribole nimitey logalog kadam uthabole koisey.
Add Comment