Sob rasta aro kona kona te apni para manu khan taikhan laga phone te busy thaka dikhi thakey. Mobile phone ke anytime aro sob jaga te cholabo para nimitey aro technology tu behtar hoija nimitey mobile phone laga istamal kora tu ekdam bisi hoijaisey. Pora likha aro student khan te smartphone laga ki asar hoi etu laga kotha koisey koiley, etu janibole jaruri asey ki smartphone laga advantage aro disadvantage duita bi asey.
Pora likha nimitey, smartphone para student khan ke nutun jankari sikhibole modod korey aro pora likha laga video aro app khan bi cholabole modod korey.Amikhan laga zindigi te smartphone laga bisi kaam aro faida asey. Etu para amikhan laga kaam asan banaidiye aro amikhan para phone cholaikina kunba manu nohoilebi bustu khan ke bisaribole laga homoi nefelai. Phone para student khan ke pora likha te bisi dangor modod dibo parey aro ekdam bhal perform kuribole modod kuribo parey.
Etu laga alava student khan para phone te entertainment(moj masti) aro manu khan logotey connect kuribole modod korey kuntu para taikhan laga samaj laga skill aro gran ke barabole modod korey.
Hoilebi student khan para smartphone ke samhaliina cholabole janibo lagey. Jarurat para bisi smartphone chola tus tudent khan nimitey disadvantage asey. Smartphone chola para student khan laga productivity ke asar korey kun khan tu phone te ekdam gusikina asey. Smartphone logotey chipkikina thaka student khan tu taikhan laga homework nohoilebi kaam khan para dhyan asani para hatijabo parey. 2014 te ekta study kora para etu janibole parisey ki student khan para taikhan laga smartphone tu kiba kibi sikhibole nimitey nohoikina bisibhak internet aro social media app jaiseki facebook, instagram khan cholabole nimitey cholai. Taikhan para resources khan bisaribole nimitey nijor library te ja bodli aram para ekta jaga te buhikina mobile te bisaribole prefer korey. Student khan tu 24/7 smartphone te thakibole mon kurikina pora likha laga indigo ke balance kuribole diktar pai asey.
Mobile phone nimitey baccha khan laga gao khan bi biya hoi asey. Taikhan laga phone te app thaka khan para taikhan laga ghuma laga routine ke olta polta kuridi asey aro diri nohoilebi bhal para nughama nimitey phujur te bhagor lagey.
Adolscents(13 – 18 years majotey thaka baccha) khan te muscle, gola khan bikha laga high risk asey aro matha ghura aro suku bikha laga problem khan ola laga chance bi bisi asey. Phone te 2 ghonta nohoile etu para bisi homoi bita para baccha khan laga komor, gola aro shoulder bikhabo. Phone te bisi diri sai thaka para suku bi biya hoijabo aro etu tu amikhan laga phone para blue violet light khan chara nimitey asey. Etu para baccha khan te matha bikha aro migraine laga problem olabo.
Mobile phone aha picheyte ekjun ekjun ke kotha kuribole asani tu hoisey hoilebi etu nimitey baat chit kora laga style bodli hoi asey. Face-to-face kotha kora tu kom hoi asey aro message pathaikina kotha kora bisi hoi asey.
Etu nimitey manu khan para aro khas kurikina student khan para mobile phone laga istamal tu samhalikina bhal para cholabole sikhibo lagey.
Add Comment