Guwahati, December 12 : Assam state election commission (ASEC) para North Cachar Hills Autonomous Council (NCHAC) laga 28 seat nimitey election laga tarik announce kurisey.
Assam laga Dima Hasao district te, NCHAC nimitey voting tu aha saal laga January 8 te hobole asey.
Dusra fale, vote laga ginti tu January 12 te hobole asey.
Etu jankari tu Assam state election commission (ASEC) para Tuesday (December 12) te disey.
Voting tu Assam laga Dima Hasao district laga 280 polling station te phujur 8 baji para loikina January 8 laga 4pm tak chulibole asey.
Assam laga NCHAC election te, pura puri 1,41,124 manu khan vote diya laga haak cholabole eligible asey aro etu 1,41,124 manu majotey 70,485 manu tu mota khan asey aro 70,639 manu tu maiki khan asey.
Nomination file kora aro candidate laga naam withdraw kuribole laga akhri tarik tu etu saal laga December 22 rakhisey.
North Cachar Hills Autonomous Council (NCHAC) kuntu Dima Hasao Autonomous Council koikina bi jana jai etu tu Assam laga ekta autonomous(nijor raaj kora) district council asey.
Etu district council ke Dima Hasao district ke administer kuribole nimitey aro etu area fale boha pahari area ke develop kuribole nimitey Constitution of India laga Sixth Schedule laga nyom bhitor te banaisey.
Etu laga headquarter tu Assam laga Haflong, Dima Hasao district te asey.
Etu council laga 30 members asey kuntu majotey 28 members ke first phase te post system para elect kurisey aro baki duijun ke Assam laga sarkar para nominate kurisey.
Etu ke Debolal Gorlosa koikina ekjun Chief Executive Member (CEM) para lead kurisey.
Dima Hasao Autonomous Council laga under te thaka jaga khan laga naam tu : Haflong, Jatinga, Borail, Mahur, Jinam, Hangrum, Laisong, Dautohaja, Maibang East, Maibang West, Kalachand, Wajao, Hajadisa, Langting, Hatikhali, Diyungmukh, Garampani, Kharthong, Dehangi, Gunjung, Hadingma, Dihamlai, Harangajao, Hamri, Lower Kharthong, Dolong, Diger aro Semkhor asey.
Add Comment