Imphal, December 13 : Ekjun high official para Wednesday din te koisey ki Manipur laga sarkar para 90 din bhitor te rajya laga bisi alag alag jaga laga 35 epicentre(main centre) te thaka 1,647 alag alag gahori farm te pura puri 1,781 gahori ke moraidisey. Local market te etu gahori khan laga daam tu total Rs 55 crore maan hobo.
State government laga authority khan para October 13, 2023 para loikina December 12, 2023 tak laga homoitey African Swine Fever (ASF) infection paikina thaka gahori aro gahori baccha khan ke moraidisey.
Dr. RK Khogendrajit Singh, Joint Director, Veterinary Department, Government of Manipur para Wednesday din te release kora ekta khata video te koisey ki tailaga department para juwa 3 moina te, pura puri 35 epicentre aro 432 busti ke cover kora aas paas laga area khan tu infected zone(infection feilikina thaka area) asey koikina identify kurisey.
Etu infection paikina thaka gahori khan ke 35 main centre aro etu laga aas paas infection feilikina thaka area khan ke control kuribole aro dusra jag ate felibole nidibole nimitey Rapid Response Team khan para moraidisey.
Etu team para 23,694 kg laga gahori dana ke bi barbad kuridisey aro 1,647 farm ke safa kuridisey.
Etu director para public khan ke aro khas kurikina gahori pala manu khan ke African Swine Flu laga detail jankari pabole nimitey official khan logotey contact kuribole nohoilebi in touch te thakibole appeal kurisey.
Tai para etu bi share kurisey ki etu department para etu risky business te aro bisi profit pabole nimitey gahori pala farmer khan nimitey training aro awareness programme organise kuri asey.
Add Comment