Imphal, December 14 : Imphal te thaka hospital laga murdaghor te rakha Kuki-Zo community laga manu khan laga dead body ke Thursday din te tight security majotey hawai jahaj para Churachandpur district te loijaisey.
Etu dead body khan ke ekta jaga para dusra jag ate loijabole nimitey duita chopper ke service te dhalidisey.
Supreme Court para Manipur laga sarkar ke Manipur te huwa larayi jhagra te jaan ja manu khan laga dead body ke izzat para tupabole nimitey bhal bondobos kuribole laga direction diya picheyte etu dead body khan ke Churachandpur district laga headquarter te rakhidisey.
Tatey 175 deadbody thakisey kuntu majotey 171 dead body tu identify(pehchan kuriluwa) laga dead body thakisey. Poila te, etu dead body khan ke rajya laga sarkar para chola Jawaharlal Nehru Institute of Medical Sciences, (JNIMS) Imphal, aro central government para chola Regional Institute of Medical Sciencs, Imphal te rakhi thakisey.
Etu deadbody majotey 83 dead body ke khandan nohoilebi baccha khan para claim( pehchan) kurisey, 88 dead body tu claim(pehchan) nukurikina asey aro 4ta dead body tu murda ghor te identify nukurikina asey.
Identify nukurikina thaka dead body khan nimitey, etu Court para Manipur laga sarkar ke etu dead body khan ke dhormic nyom hisap te tupabole nohoilebi antim sanskar kuribole koisey.
Manipur laga sarkar ke sob dead body laga DNA sample bi jama kuribole koisey kilemaney bisi murija manu khan tu bisi alag alag criminal investigation laga hisa thakisey.
Manipur laga Kangpokpi district te thaka ekta shaktishali tribal bhitormanu group, Committee on Tribal Unity (CoTU) para Kuki-Zo manu khan laga claim nukurikina thaka deadbody ke claim kuribole announce kurisey.
Etu announcement kora tu May 3, 2023 te Kuki aro Meitei khan laga majotey jati aga larayi chuli thaka te shanty anibole nimitey utha aro ekta kadam asey aro etu te 200 maan manu laga jaan jaisey.
Add Comment