Headlines

Nationwide Strike te State NHM Employees kan manise

October 25, 2018

KOHIMA, OCTOBER 25 : National Health Mission Employees Association Nagaland (NEAN) kan Thursday din 1 din nemite Nationwide Strike mana ke mani kena thakise. Etubi All India National Health Mission Karmchari Sangh (All India National Health Employees Association) kan pora manibole kura ke.

NEAN President, Dr. Shasinlo Magh aro General Secretary, Kewetso Kenye pora etu din te etu Strike manibole kura toh tai kan employees kan ke ekta hisab pora kam kuribole debi koi kena mana laga ase. Kele tai kan employees kan ke aram pora aro shant pora kam kuribole nade kena ulta besi dukh pora kam kuribole de ase. Huilebi dhanka kan diya toh ekta hisab pora debole nakuri. Etu NEAN hisabte bi tai kan ekta kotha (memorandum) toh Prime Minister Office te bi dese. Huilebi etu nemite edia dak eku saidebole nakuri kena ase koise. Etu karne etu chamala nemite saidebole kuribi koi kena khilaf pora janaidiya hisabte mana laga ase koise.

NEAN President porabi kam kura nesena hisabte dhanka bi debole kuribi, NHM Employees kan nemite Basic Service babole thaka hisabte manibi, Government of India laga Guidelines nesena HR Policy bi manibole kuribi aro Service toh regularize hisabte manibole kuribi koi kena janaise.Tai bi GOIs Flagship Programme National Health Mission laga naam pora 2000 NHM Employees kan Nagaland pora aro 3 lakhs jun NHM Employees kan ami kan desh laga sob states pora kam nemite 15 sal kurikena ahese. Huilebi edia dak Socil, Financial aro Service kan nemite eku bhal te saide kena nai koi kena janaise.

NEAN General Secretary pora toh State Sorkar ke GOI pora kedia dhanka nemite poisa batai etu time te hi dhanka debole time te thik time te debole kuribi koi kena janaise. Kele etu porahi kam kura manu kan kea ram aro shant hobo aro etu pora tai kan kam kura toh bhal te jabole bara hobo koi kena. Aro NEAN members kan porabi tai kan state NHM HR Policy laga memorandum toh Ministry of Health aro Family Welfare ke chulti pora bataidebole aro dedebole kuribo. Aro etu kotha ke chuti manibole kura nai koile tai kan India laga sob NHM kan 2nd Phase hisabte etu Strike toh aro manabole kuribo koi kena janaise.