Imphal, January 12 : Manipur Pradesh Congress Committee (MPCC) laga president K Meghachandra para Friday din te Imphal laga Congress Bhavan te newsmen ke kotha kora homoitey janaisey ki Indian National Congress laga President, Mallikarjun Kharge para Sunday (January 14) te Imphal para 35 km dur thaka Thoubal district laga Khongjom War Memorial Complex laga opposite te thaka ekta private ground te Bharat Jodo Nyay Yatra tu flag off kuribole asey.
K Meghachandra, kun ekta sitting MLA bi asey tai para etu safa safi koidisey ki district commissioner para etu private ground te dangor scale te etu yatra organise kuribole permission disey.
Manipur laga sarkar para Imphal East laga Hapta Kangjeibung jag ate kanoon aro beybosta laga situation eman thik nai koikina kiba kibi restriction lagaikina cholabole permission diya nimitey K Meghachandra para kara para condemn kurisey.
Ekta newsman para huda sawal laga jawab dikina etu MPCC president para jor dikina koisey ki etu Yatra tu rajneetik maksat para kora laga nohoi.
Etu yatra te Congress laga ekta flag bi cholabole nohoi. Dangor manuu jaiseki dusra rajya khan laga Chief Minister aro ex-Chief Minister khan etu yatra te bhag loble asey.
K Meghachandra para koisey ki etu Yatra tu Mnaipur government laga against te nohoi. Etu tu ekta democratic yatra hobole asey aro etu para Manipur te shanti anibole aim kuri asey.
Etu yatra te 14 rajya laga 85 district cover kuribole asey. Cover kuribole thaka 14 rajya tu Manipur, Nagaland, Assam, Meghalaya, West Bengal, Bihar, Jharkhand, Odisha, Uttar Pradesh, Madhya Pradesh, Chhattisgarh, Rajasthan, Gujarat aro Maharashtra asey.
Add Comment