Guwahati, January 12 : Assam laga cabinet minister Pijush Hazarika para koisey ki sarkar para Congress party ke school khan te Bharat Jodo Nyay Yatra kuribole permission nidibo.
Friday din te reporter khan ke kotha kurikina, Hazarika para koisey ki etu Yatra kuribole nimitey Congress para permission mangibole jarurat nai kilemaney Assam laga Chief Minister para already koikina asey ki etu mamla te Congress ke para tak sob modod dibo. Hoilebi, etu cabinet minister para koisey ki Assam sarkar para school khan te Yatra kuribole karney permission nidibo koikina safa safi koidiya nimitey, Congress khan para taikhan ke rajya te Yatra kuribole permission diyanai koikina galat jankari felai asey.
Piyush Hazarika para enaka koisey, “Chief Minister para kuwa nisna permission mangibole jarurat nai. Khali etu hey asey ki taikhan para etu Yatra tu school khan te class chuli thaka homoitey kuribo naparibo. Sobsey poila tu etu ekta Nyay Yatra nohoikina Anyay Yatra asey. CM para koisey ki etu yatra tu school aro college khan te kuribole nidibo hoilebi Sunday din te tu kuribole dibo. Ami BJP khan para enaka tu nokorey. Amikhan para school bon kuridikina tatey meeting nokorey. Hoilebi taikhan(Congress) para enaka kuribole mon asey. Aro etu nimitey taikhan tu apsoos hoisey. Hoilebi alag jaga khan te tu amikhan para taikhan ke modod kuribo. CM para etu safa safi koisey. Hoilebi school aro college khan te nohoi.”
Assam laga Chief Minsiter Himanta Biswa Sarma para ageyte koisiley ki judi Congress para Assam te Bharat Jodo Nyay Yatra kuribole permission mangisey koiley sarkar para permission dibo. Hoilebi tai para koisey ki Congress para Assam te etu Yatra kuribole laga permission manga laga eku khobor aha nai.
Congress para taikhan ke Dhemaji district laga Gormukh jag ate thaka ekta school aro Jorhat laga ekta college te buhibole laga permission dibole inkar kuriisey koikina kuwa laga mamla te CM Himanta Biswa Sarma ke sawal kora homoitey tai para jawab disey ki school aro college chulithaka homoitey etu ke cholabole laga permission tu dibo naparibo. Hoilebi Sunday din hoisey koiley taikhan tatey thakibo paribo.
Congress leader Debabrata Saikia, kun Assam Assembly te opposition laga leader bi asey tai para koisey ki sarkar para Dhemaji aro Jorhat te school aro college khan cholabole permission dibole inkar kora nimitey Congress party tu manu khan laga farmland nohoilebi field khan te container rakhibole laga dusra upai bisari asey kotey senior party leaders aro Rahul Gandhi bi ek rati nimitey thakibole asey.
Assam te hobole thaka etu 8 din laga Yatra tu January 18 para 25 tak chulibo aro rajya laga 17 district ke cover kuribole asey.
Add Comment