Guwahati, January 28 : Ban hoikina thaka atangwadi group Unified Liberation Front of Asom-Independent (ULFA-I) para January 28 te taikhan laga ekjun member laga confessional video release kurisey, kun laga opor te jasoos kora laga suspect thakisey.
You Tube te share kora video te ULFA-I laga leader khan para Manash Borgohain (dusra naam Mukut Axom) ke taikhan laga group laga kanoon ke bhanga nimitey arrest kurisey koikina announce kurisey.
Arrest huwa picheyte, Mukut Axom para ekta video message laga through para confess kurisey ki taikey Assam laga state authorities khan para ULFA-I laga opor te jasoos kuribole pathaisiley. Tai para koisey ki tai tu 2021 para Assam Police laga Special Branch logotey kaam kurisey. Aro tai tu ULFA-I laga kaam khan te najar rakhibole laga mission te thakisey koikina bi koisey.
Mukut Axom para tailaga confessional video te koisey, “Ami tu Assam Police laga Special Branch te kaam kuri thakisey aro 2021 para ekta sub-inspector hoikina kaam kuri thakisey. Ami laga ID NO tu – IG8371963421 asey. Etu ID NO. laga through para apnikhan para amikey SB laga sub-inspector asey koikina chinibole paribo. 2021 te amikey Special Branch te dhala homoi para amikey ekta special mission te dhalikina thakisey. Etu mission laga through para amikey ULFA-I laga khilaf te kaam kuribole aro etu group laga kaam khan ten ajar rakhibole koisiley. Lagatar kaam kurikina aro etu group laga member khan laga biswas jitibole kosis kurikina, olop homoi picheyte amikhan para ULFA-I laga biswas jitibole parisey.”
“Etu picheyte, ami para November moina te ULFA-I join kurisey. ULFA-I join kora tu amilaga mission thakisey. Etu group te join kuribole ageyte eku brain wash kora laga thakanai. Etu tu pura puri ekta mission thakisey. Amikey Manab Chaliha aro Digambar Pandey para etu mission laga hisa banaisiley. Aro amikey GP Singh, Partha Sarathi Mahnata aro Bhaskarjyoti Mahanta para etu mission nimitey direct kurisey. Moi ekla nohoikina, tatey bisi alag alag jawan mota aro maiki khan bi asey kunkey poisa offer kurikina etu mission te shamil kurisey. Taikhan laga demand accept kora picheyte, amikhan para authority khan laga order diya hisap te chulibole aro ULFA-I laga against te chup chap kaam kuribole faisla kurisey. Amikhan para Guwahati laga Khanapara te etu mission nimitey training paisey. Amikhan laga primary training tu Biometrics te disey, etu tu kuntu mohol aro situation te hoilebi ULFA-I para chola system te kinaka barbad kuridibo etu laga training thakisey.”
Mukut Axom para etu mission nimitey training pa laga kotha ki janaisey aro taikhan ke ki ki kaam kuribole nimitey train kurisey etu khan bi janaisey. Jaiseki ULFA-I laga system ke barbad kuridiya aro dusra desh khan ke ULFA-I tu biya asey koikina dikhaidiya laga kaam khan. Tai para koisey ki tai tu 8jun member thaka ekta team laga hisa thakisey.
