Imphal, February 01 : Manipur laga Moreh town laga sub-divisional police officer (SDPO) ke moraidiya te shamil thaka duijun manu para etu jurum kurisey koikina confess kurisey.
Etu duijun mujrim laga naam tu Philip Khaikkholal Khongsai aro Hemkholal Mate asey. Taikhan duijun tu hathyar aro barud khan bukha nimitey arrest hoisiley.
Taikhan para Manipur Police Service (MPS) officer Chingtham Anand Kumar ke moraidiya laga jurum te shamil thakisey koikina confess kurisey. Chingtham Anand Kumar tu Manipur te Moreh laga SDPO thaisey.
Chingtham Anand Kumar ke October 31, 2023 te hathyar bukhikina thaka militant para guli marikina moraidisiley. Etu ghotna huwa tai tu Manipur laga Moreh town te helipad banabole nimitey Eastern Shine School laga ground ke safa kora laga kaam te nazar rakha laga duty te thakisey.
Taikhan police custody te thaka homoitey etu Kabul kurisey ki taikhan tu Moreh laga SDPO ke moraidiya te shamil thakisey.
Etu picheyte, investigating officer (IO) para Anand Chingtham ke moraidiya laga case te connection thaka nimitey taikhan duijun ke formal arrest kuribole request apply kurisey.
Imphal West laga court of special judge NIA para etu duijun mujrim ke formal arrest kuribole laga ijajat disey. Aro taikhan duijun ke February 12 tak adalat laga custody te pathaikina asey.
January 17 laga phujur para, bhari hathyar bukhikina thaka militant(atangwadi) khan para Moreh te khatarnak hathyar cholaikina, duijun Manipur police personnel ke moraidikina aro 7 jun manu ke jokhom kurikina hamla suru kurisey.
