Guwahati, February 04 : Prime Minister Narendra Modi para koisey ki BJP laga ‘double engine’ sarkar para aha ek saal te Northeast te Congress sarkar para 10 saal te kiman poisa felaisey etu para bi bisi poisa felaisey.
Sunday(February 04) te Guwahati te dangor public rally te bhasan diya homoitey, PM Modi para koisey ki poila laga sarkar para Northeast laga infrastructure(building aro ki ki bana) te Rs 12 lakh crore poisa felaisey. Tai para koisey ki Centre te thaka BJP sarkar para next ek saal te etu ekey kimat khorcha kuribo.
PM Modi para enaka bi koisey ki juwa 10 saal te, NDA sarkar para Northeast te poisa khorcha kora tu 4-guna bisi baraidisey. Etu mamla te, Prime Minister Modi para enaka bi koisey ki Railway Budget tu 400% para barisey aro tourism bi bisi barijaisey.
Agey barikina, Northeast te development ana laga kotha koikina, PM Modi para enaka bi koisey ki NDA laga sarkar office te aha picheyte, Assam laga medical college khan tu barikina 12 hoijaisey. Congress sarkar laga homoitey medical college tu 6ta maan thakisey. Tai para agey barikina koisey ki ilaj kora laga building aro subidha khan upgrade kurikina, Assam tu Northeast region te cancer treatment kora laga centre hoisey.
Development laga kotha kurikina, PM Modi para koisey ki taikhan para desh te 2 crore para 3 crore lakhpati didi banabole laga aim upgrade kuri asey. Tai para koisey ki juwa ek saal te, desh te 1 crore lakhpati Didi banaikina ahi asey. Aro etu para taikhan ke aha saal nimitey taikhan laga aim barabole modod kurisey. Tai para etu bi koisey ki Assam te bi etu scheme laga subidha tu lakh opor maiki khan para paisey.
Add Comment