KOHIMA, OCTOBER 28 : Nagaland Health aro Family Welfare laga Principal Secretary, I Himato Zhimomi pora koa hisabte ami kan Nagaland state toh Nasopharyngeal Cancer thaka Duniya sob pora hisab kurile 3rd Highest naam te ahe kena ase. Etubi Tobacco khai kena koi kena janaise.
Tai koise Major Towns kan kobi Dimapur aro Kohima te toh Healthcare aro Dentist kan besi ase aro bhal te kam julai kena jai ase. Huilebi Nagaland state laga besi bhak jaka kan te toh etu Dentists aro Doctors kan besi komti ase aro eman nai koi kena janaise.
Dimapur te Saturday din Indian Dental Association (IDA), Nagaland Chapter laga 16th Annual General Meeting thakise. Etu time te Himato Zhimomi toh Special Invitee nemite ahe kena thakise. Etu time te kotha kurikena tai etu Nasopharyngeal Cancer nemite thik pora aro bhal te husir kurikena saidebole kurile bhal. Aro Dental Care nathaka jaka te etu Dental Care ulaide kena thik pora kam julabole kurile bhal koi kena janaise.
Etu nemite tai Dentist kan besi diktar bai (face) thaka laga Challenges kan 4 ta hisabte bhal kotha janaise. Etu ke tai ahke wala toh Skills aro Knowledge toh etu Dentistry laga kam julabole karne ahkete bhal te anedele hobo koi kena janaise. 2nd wala ke tai kedia Patients logot sabole jaa time te Dentist kan bhal te aro morom pora sabole kuribo lagi koi kena janaise. 3rd wala ke tai ami kan state te 150 pora 200 nesena Dentist hi ase. Etu pora ami kan state laga dur jaka (Remote areas) te Doctors kan eman nai. Etu karne etu jaka te jai kena Dentist kan aro Doctors kan jai kena bhal te saidebole kuribo lagi koi kena janaise. Aro 4th wala ke tai ami kan state laga manu kan Tobacco khaa besi huijaa ke kinika nakhabole debo etu nemite saidebole kusis kuribole lagi koi kena janaise.
Etu din te IDA Nagaland Branch President Dr. Kezeneilie Pienyu pora bi katha kotha kurise. Etubi Principal Secretary pora etu Dentists kan Nagaland nemite bhal kotha janaidiya laga kotha hisabte.
Add Comment