Imphal, February 09 : Northeast rajya Manipur te, Meetei Council, Moreh (MCM) para India-Myanmar border te fencing dhala laga mamla te ekta dangor demand rakhisey.
Etu council para Prime Minister Narendra Modi aro Union Home Minister Amit Shah ke India-Myanmar border te fencing dhalibole laga faisla luwa nimitey khusi jataisey. Hoilebi fencing banabole ageyte zameen ke bhal para survey kuribole request kurisey.
MCM laga general secretary, Leishangthem Brojendro Meitei para etu fencing bana homoitey rajya laga kuntu hisa ke bi compromise nukuribole laga jaurat tu janaisey.
Ekta press release te, MCM para Centre ke border te fencing dhala laga kaam tu speed kuridibole bi request kurisey. Aro sarkar ke ekdam bhal para survey kuribole request kurisey taki zameen laga ekta hisa bi harai najabo.
Etu press release te enaka koisey, “Etu fencing para hosa te bi India-Myanmar border para drugs aro hathyar khan gairkanooni tarika para ana loija kora aro Myanmar laga manu khan India te illegally gusa tu check kuribo. Aro etu para India aro Myanmar majotey nafrat felaidiya laga kaam kora manu khan aha juwa kora bi kom kuridibo. Manipur te bisi Myanmar laga manu khan illegally gusa nimitey taikhan para etu faisla ke swagat kurisey. Manipur te India-Myanmar border ke khula charidiya para Manipur te etya chuli thaka jhamila ke aro bisi baraidibo. Aro etu nimitey MCM para India laga Union Government ke etu fence bana laga kaam tu kiman joldi parey eman joldi suru kuribole request kuri asey. Aro etu kaam suru kuribole ageyte, sarkar ke utu jaga laga survey bhal para kuribole request kuri asey taki amikhan laga zameen laga ekta hisa bi harikina najabo.”
India aro Myanmar border tu 1,643 kilometre lamba asey. Aro Manipur te India-Myanmar laga fencing nathakikina khula thaka boundary tu 398 kilometre laga asey.
Add Comment