NEW DELHI, OCTOBER 30 : Nagaland state laga Sentipokla Jamir pora ami kan state ke khushi kuridese. Etubi National Capital, Newl Delhi, October 21 te “India’s Great Leader’s Award” bai kena. Aro etu Award din toh National Human Welfare Council pora ula laga ase koise. Etu Award debole kura toh tai ekta chotu initiative kobi “Footprints” koi kena tai laga amma-bapa pora mon te chuhidebole kurikena chuhidiya laga pora akhete bhal te luijabole kurikena manibole bara karne diya laga ase koise. Etu “Footprints” koi kena initiative toh 2015 sal pora suru kurikena manise. Etu ke poisa toh Pickles kan bekai kena hutai moina Rs. 100 toh chama kuri thakise. Aro sal khotum hua bejete toh Blankets aro Rice-cookers kan kinni kena dukhiya manu kan aro Widows/Widowers kan ke debole kurikena thakise koise. Etubi Nagaland laga bosti jaka kan laga dukhiya manu nemite. Etu kan sob tai dukh kurikena dukhiya manu kan nemite saidebole kurikena thaka karne tai logot etu Award bai ase koise. Aro etu Award kan baa toh tai ekela nahui kena tusera kanbi alak-alak chis hisaabte Award bai kena thakise. Etubi 20 states pora. Etu ke 30 Award baa manu kan Education Field aro 30 toh Social Activist pora thakise koise. Aro tai kan sob logot Press Club India, Raisini Road New Delhi te 21st October 2018 te Chief Guest Sh. Manish Sisodiya, Deputy Chief Minister, Delhi laga bi thaka time te etu Award dedese koise.
Sentipokla Jamir “India’s Great Leader’s Award” baise
Add Comment