Imphal, March 5 : Bisi lamba investigation kora picheyte, central bureau of investigation (CBI) para duijun Meitei student ke kidnap aro murder kora laga connection te arrest huwa 5jun manu laga khilaf te charge sheet ile kurisey. Etu duijun Meitei student laga murikina thaka deadbody tu ekta jungle area te paisey, etu bhayanak ghotna para social media te bisi manu laga dhyan khichisey.
Manipur Chief Minister N Biren Singh para Congress MLA K Meghachandra para Tuesday (March 05) te state assembly session chuli thaka homoitey, janaisey ki CBI para duijun Meitei student gayap huwa laga case ke sai asey.
Manipur Chief Minister para agey barikina janaisey ki CBI para etu jurum laga connection te arrest huwa 5jun manu laga khilaf te charge sheet file kurikina action loisey.
Jitya aro bisi jankari dibole koisey, Manipur Chief Minister N Biren Singh para koisey ki etu mamla tu etya ekta independent investigative team laga haath te asey.
Manipur te juwa saal laga May 3 te ola jati laga larayi chuli thaka homoitey, duijun haraikina thaka Meitei student- Phijam Hemjit (20 years laga) aro Hijam Linthoingambi (17 years) laga photo feilija picheyte plain area te bisi jordar protest hoisiley. Etu duijun student tu July 6, 2023 te gayab hoijaisiley.
Hoilebi, utu homoi para loikina etu case tu CBI laga jurisdiction ke transfer kuridisey.
Manipur police para pa CCTV footage te etu duijun student tu ekta KTM bike te Manipur laga Churachandpur district laga Lamdan jaga para Khoupam fale jai thakisey. Etu area tu Kuki aro Meitei community majotey larayi jhagra chuli thaka nimitey khatra te thakisey.
