March 12, 2024 : Awareness cum plantation drive loishey, National Clean Air Programme (NCAP) under tey, PM SHRI Government Higher Secondary School, Thahekhu under tey, Dimapur tey, 12th March, 2024 tey, kuntu toh hoiley ADC Dimapur – Mhalo Humtsoe aru EAC Dimapur -Imlijungla Lemtur para grace kurishey.
Itu programme laga homoi tey, itu ADC para state kurishey ki, itu Dimapur laga hawa laga quality toh hoiley giri giri jai asey hudai din, ekta industrial city nahoilebi. Tai para state kurishey ki, itu toh hoiley khali Government official khan laga he responsibility nahoi, itu environment toh aru- bhal banaboley, hoilebi itu toh hoiley sob manu khan laga responsibility asey. Tai para itu bhi note kurishey ki, chutu mutu effort para toh dangor impact hoi aru itu nimitey sob manu khan ke matishey, eke logotey ahi kena ekta team hoi kena kaam kuriboley. Tai para tatey aha laga manu khan ke matishey awareness toh spread kuriboley karney, itu laga opor tey.
Dimapur laga EAC – Imlijungla Lemtur para state kurishey ki, Dimapur toh hoiley declare kuri kena asey ekta non- attainment city koi kena, itu hawa laga quality standard nimitey, kuntu toh hoiley itu nation laga average para bhi komti tey asey, continue paach saal pichey para. Tai para koishey ki, Municipal Council toh hoiley tai khan laga best di asey, aru citizen khan ke matishey, tai khan laga part toh kuriboley, ekta responsible citizen khan hisap hoi kena, moi khan laga hawa laga quality toh aru-bhi bhal banaboley.
Add Comment