Manipur : Displaced manu khan ahibole thaka Lok Sabha election nimitey vote dibole mon nathaka

Imphal, April 2 : Central Government para ahibole thaka 18^th Lok Sabha Election te taikhan laga voting rights chlabole nimitey internally displaced persons(IDPs) khan nimitey special arrangement kuri asey. Hoilebi enaka affect hoikina thaka bisi bhak manu tu election te bhak lobole interest haraikina asey.

India laga alag jaga khan nisna, larayi jhagra huwa rajya Manipur bi 18^th Lok Sabha election nimitey tayari kuri asey. Manipur ke bhak kora duita Member of Parliament (MP) seat laga election nimitey pura puri 10ta candidate laribole asey. 

Authorities khan para pura preparation kora laga bawajut bi, election laga vibes tu bisi komti nisna dikhi asey. 

Kunba manu khan para bi election lag atayari tu jhamila ke resolve kuribole ageyte election kora nimitey condemnation laga ekta mark nisna denounce kurisey. Dusra fale, samaj laga kunba section para bi taikhan laga etu view tu positive aspect te jataisey ki etu election para hosa te bi thik candidate chunikina ekta nutun Mnaipur create kuribo. 

Manipur laga etu jhamila te 58,000 opor manu khan nijor ghor para dur hoikina asey aro taikhan tu 300 opor  relief camp te buhi asey. Manipur laga situation tu olop thanda hoikina aro control te asey hoilebi bisi bhak nijor ghor para dur hoikina thaka manu khan tu etya bi relief camp te buhi asey. Etu manu khan laga voting right ke ensure kurikina, authority para etu affect hoikina thaka manu khan nimitey special bondobos kurisey.

Chief electoral officer, Pradeep Kumar Jha para issue kora statement hisap te, IDP khan tu taikhan kuntu jaga para displace hoisey etu jaga laga ordinary resident nisna consider kuribo. Taikhan ke taikhan laga original jaga laga voter nisna treat kuribo, Hoilebi taikhan laga diktari ke saikina, taikhan para vote tu Relief camp khan te dhalibole asey. 

Aro etu nimitey, sob district para Assistant Returning Officer ke appoint kuribo. Etu displace hoikina thaka manu khan laga special arrangement nimitey 94 maan Special Polling Station khara kuribole asey. 

Government para displace hoikina thaka manu khan nimitey khas bondobos kora laga bawajut bi. Relief camp ke visit kora para etu notice te ahisey ki bisi bhak displace hoikina thaka manu khan tu election te bhak lobole eman interested nai. Kilemaney government laga opor para taikhan laga biswas haraijaisey.