THANE, NOVEMBER 2 : Latera Sabha kura manu 3 jun aro 2 jun jui saa kan sob melekena 5 jun kan Latera koa te ekjun-ekjun ke motub kuribole kuri thaka time te norom mati te phasi kena murise. Etubi Mahrashtra, Kalyan Town laga latera koa (well) te Thursday din koi kena, Police pora khobor te janaise.
Kolshewadi Police Station laga asul khobor hisabte etu chamala toh 2:00 pm paji phale hua laga ase. Etu ke 1 jun ki-ki latera-batera sabha kuribole jaa time te norom mati te phasi jaise. Etu karne 2 jun manu tai ke pachaidebole jaa time te tai 2 jun bi etu norom mati te phasi jaise. Aro tai kan phasi kena thaka nemite tusera manu kan pora Local jui saa manu ke motub kuridebole janaise. Etu time te aro 2 jun Jui saa manu motub kuribole jaise. Huilebi aro tai 2 jun bi phasijaise. Eneka huikena tai kan sob etu norom mati pora murijaa huise. Aro etu norom mati hi nahui kena latera bi besi latera aro ghuntha jaka ase koise.
Etu chamala karne arobi tusera manu kan (Team of divers) Safety Belts, ropes, oxygen cylinders aro masks kan lakai kena etu latera koa te etu 5 jun ke motub kuribole kusise. Etu time te 1 jun sabha kura manu ke bahar te ulaidebole barise. Aro baaki tusera kan ke toh besari ase koise.
Etu sabha kura manu toh Rahul Gosavi koi kena ase. Aro 2 jun jui saa manu toh Pramod Waghchire aro Anand Shelar 2 jun ase koi kena, Official pora janaise. Local manu kan hisabte etu latera koa toh Netivali jaka laga nallah osorte ase. Aro etu koa te etu nallah pora latera pani kan chemicals mixed kuri kena thaka lui anede thaki. Etu pora etu koa laga khaa pani toh pura latera kuride aro khabole nabara ekta huijaide kena ase koise.
Add Comment