May 10, 2024 : Sano Vamuzo kuntoh hoiley Social Worker aru Educationist asey, Nagaland para, tai ke itu Padma Shri Award present kurishey, India laga President – Droupadi Murmu para itu Civil Investiture Ceremony-II laga homoi tey, kuntu toh hoiley Rashtrapati Bhavan, New Delhi tey loishey, 9th May 2024 tey. President Jagdeep Dhankhar; Prime Minister Narendra Modi; Union Home Minister Amit Shah; External Affairs Minister S. Jaishankar bhi thakishey, tatey thaka laga dignitary khan majetey, itu award ceremony laga homoi tey.
Sano Vamuzo ke toh hoiley tai khan laga exceptional aru distinguished service nimitey confer kurishey itu award toh, itu social work laga field tey, aru peace campaign khan spearhead kuria nimitey aru maiki khan laga representation champion kuria nimitey.
Sano toh hoiley 27th March 1940 tey jonom hoa laga asey, Dr. Sevilie Iralu aru Vituno Iralu laga bacha hoi kena. Tai toh hoiley alag alag school khan tey shikhaishey aru ekta school bhi shuru kurishey Chozuba – Mission English School koishey (itya itu toh Eastern Christian School, Chozuba asey) aru itu school laga first headmistress thakishey, 1967 – 1971.
Tai alag kunba ama khan logotey mili kena, Naga Mothers’ Association (NMA) found kurishey, 1983 tey social evil khan ke fight aru itu maiki manu laga status khan uplift kuriboley, ‘Humanity Integrity’ motto logotey.
Add Comment