New Delhi, July 23 : Akshay Kumar tu ajikali film industry laga sobsey mashoor actor majotey ekta asey. Ek saal te tailaga 4ta maan film release hoisey. Etu saal tu Akshay para tailaga film box office te success huwa dikhibola baki asey. Tai para Forbes India ke kotha kora homoitey koisey ki tai tu film laga role chuna te aro bisi hosyar hoisey. Kilemaney lockdown picheyte audience tu bisi bodli hoisey.
Ekta interview te Akshay parataikey sawal huda homoitey jawab dikina koisey ki lockdown picheyte audience khan bahar jaikina cinema sabole te bisi selective hoisey(bhal para film select kurikina sabole jai). Etu nimitey pura puri entertain kuridiya aro kiba alag offer kora film chunibole jaruri hoisey. Tai film laga content ke loikina aro bisi hosyar hoisey. Taki tailaga film tu ajikali laga homoi logotey milibo aro audience khan ke enaka experience dibo ki taikhan para theatre te aha tu waste najabo. Etu tu enaka kahani bisara laga bari te asey kuntu para audience khan ke khali entertain kora hey nohoikina taikhan logotey gehrayi para connect kuribo paribo.
Akshay ke akhri bar Sarfira film te dikhisey. Kuntu tu South actor Suriya laga film Soorari Pottru laga Hindi remake asey. Etu film tu Air Deccan Founder Captain GR Gopinath laga zindigi te huwa ghotna laga opor te banaisey. Tai para Tiger Shroff logotey Bade Miyan Chote Miyan film bi kurisey kuntu toh April te release hoisiley.
Add Comment