New Delhi, July 25 : Vijay Sethupathi laga 50th film Maharaja tu Tamila Nadu te sobsey hit film majotey ekta olaisey. Aro tailaga career te etu ekta special film hoisey. Release huwa homoi para, etu film para audience aro critic(film ke judge kurikina bhal biya kuwa manu ) laga mon jitiloisey. Aro 3 hapta para bi komti homoitey Rs 100 crore opor kamaisey.
Release huwa din para loikina etu film tu bisi bhal kamayi kuri asey. Aro Tamil Nadu laga single theatre te bi bhal perform kurikina ahi asey. Etu film ke Nithilan Swaminathan para direct kurisey. Etu Tamil bhasa te shoot kora action film para josh tu khali box office te ekla nohoikina OTT platform te bi bisi bhal perform kurikina dikhaisey.
Etu movie tu OTT(internet) te release huwa picheyte, logalog sob manu laga favourite hoijaisey. ‘Maharaja’ laga bari te exact data tu nai, hoilebi reports hispa te etu film tu chart te top kurisey. Aro film sa manu khan para etu film khusi paisey.
Etu film ke The Route, Think Studios aro Passion Studios para produce kurisey. Etu film te Vijay Sethupathi main role te asey. Aro tailogotey Anurag Kashyap, Mamta Mohandas, Natarajan Subramaniam, Abhirami Gopikumar, Singampuli, Aruldoss, Munishkanth, Sachana Namidass, Manikandan aro Bharathiraja bi thakisey.
Etya enaka jankari paisey ki etu film para audience khan ke aro ekbar akarshit kuribole asey, etu baar Hindi Bollywood remake logotey. Aamir Khan laga production house para etu film ke Hindi te re-banabole laga rights paisey. Aamir Khan para etu Tamil film te tailaga unique twist dhalibole asey.
Enaka bi kotha chuli asey ki Aamir Khan tu etu film ke khali produce kuribole hey nohoikina tai Vijay Sethupathi laga role bi kuribole asey.
Etya tu Aamir Khan Sitaare Zameen Par film logotey busy asey.
Add Comment