BHUBANESWAR, NOVEMBER 22 : Purana Rajya Sabha member, Odisha state laga Baishnab Charan Parida toh Thursday pujutte Private Hospital te murijaise. Etubi besi din bemar hui thaka bejete koi kena, khor manu laga khobor hisabte pora janaise.
Tai mura time te tai 77 sal toh huikena thakise. Aro edia toh tai laga maiki, moda bacha aro maiki bacha kan hi ase koise. Etu Purana RS Lawmaker toh ekta bhal Politician, Writer, Columnist aro Social Activist nemite thaka laga ase. Aro tai Rajya Sabha te July 2010 sal te BJD Ticket pora huikena thaka laga ase. Eneka huikena tao July 1, 2016 te etu Rajya Sabha member nemite thaka khotum huijai kena thakise koise.
Tai toh 1941 sal te Jaipur District, Rajasthan state laga te junum hua laga ase. Aro tai Communist Party of India (CPI) Party nemite 1960 pora 1991 sal dak thaka laga ase. Eneka huikena tai 1974 sal te Moscow, Russia desh laga te khor manu logot eke pora jaijaise. Etubi Indo-Soviet mela-mele kuri kena ahkete luijaidebole karne. Aro tai etu desh te 1989 sal dak thakise. Aro 1993 sal te India desh te wabas ahe kena Indian National Congress Party huijaise. Aro tai 1998 sal dak etu Congress Party nemite thaki kena Samajwadi Party karne 1999 sal te huijaise. Etubi State SP Party President nemite. Eneka huikena tai SP Party nemite 2008 sal dak thaki kena BJD Party huijaa laga ase koise.
Tai mura nemite Odisha Chief Minister Naveen Patnaik; Petroleum Minister Dharmendra Pradhan; Odisha Pradesh Congress Committee president Niranjan Patnaik; BJP state unit president Basant Panda, legislature party leader K V Singhdeo aro Samajwadi Party state president kan pora mondukh laga kotha kan janaise koise.
Add Comment