Headlines

Chare EAC Office kan Golden Jubilee manaise

November 22, 2018

TUENSANG, NOVEMBER 22 : Tuensang District laga Chare jaka laga Extra Assistant Commissioner Administrative (EAC) Headquarters kan tai kan EAC Office jaka te Golden Jubilee (1968-2018) manaise. Etubi 20th November 2018 te. Aro etu din te Special Guest nemite Muthingnyuba Sangtam, MLA, 52 Longkhim-Chare AC laga thakise. Aro tai pora etu din toh bhal te suru kurikena manaidese koise.

Etu din te Host of Dignitaries kan alak-alak Civil Society, Heads of Offices kan alak-alak Departments laga, Village Council Representatives, DBs, GBs, Church Workers, Tribal Hoho Representatives, Student Leaders, Invitees aro Well Wishers kan sob ahe kena thakise koise.

Etu Chare EAC Administrative toh 1956 sal pora kholibole kurikena ula laga ase. Etubi Area Bench Court hisabte. Etu bejete 1960 sal te etu toh Area Superintendent nemite banaidese aro anedese (upgraded). Aro 1968 sal te toh pura-puri Circle Officer hisabte banaidese aro anedese koise. Etu bejete 1975 sal te etu Purana Chare Town toh tusera jaka te botli huijaise. Eneka huikena edia kutte ase etu jaka te hi thaka huijaa huise koise.

Etu din laga Programme te kotha kurikena Muthingnyuba Sangtam, MLA pora kotha kurikena ADC Longkhim, EAC Chare aro Public kan ke besi khushi baa aro salam diya janaise. Kele tai kan etu din toh bhal te manabole kurikena mana nemite. Etu oporte tai bi alak-alak Departmental Officers kan ke etu jaka te bhal te kam julai kena ahkete jabole nemite mon de kena bhal pora kam kuribole kuribi koi kena janaise. Tai bi DBs aro GBs kan ke etu Local Administration logot bhal te mela-mele kurikena thakibole kuribi. Kele etu porahi etu jaka te kanoon aro halat kan thik te huijaa hobo koi kena janaise.

Welcome Address janaide kena Kupeusing Meru, EAC Chare pora etu Chare jaka laga Public aro Sorkar kan nemite etu nesena din toh kahani te besi bhal wala (Significant Milestone) din ekta ase koi kena janaise. Etu din laga ahke Programme te Special Guest pora Jubilee Monolith aro Souvenir dedese. BYE Choir pora toh gaana gaaidese. Aro Special Cultural Dances toh Trongar, Chare aro Kiding Village Dancing Troupes pora dekhaidese koise.