Meaningful vision

Jaija homoi ke saisey koiley Nagaland logotey idea laga eku kaami nai.  Aro etu tu nutun-nutun aro dangor economic project khan launch kora para dikhi pai asey, kuntu tu 1970s fale hoisey. Etu homoitey, bisi dangor karobar, jaiseki paper mills, sugar mills, plywood industries aro fruit canning factory laga suruwat kurisey, economy ke barabole laga dangor akha loikina. Taikhan logotey potential thaka laga bawajut, etu project khan tu kamjor hoijaiseyaro etya bon hoikina asey. Jaija homoi laga ekta bachikina thaka hisa, jitya industrialization ke kamyab hobole laga ekta jariya nisna sai thakisey. Etu failures khan tu economic planning te sustainability(matlab lamba chola), bhal para plan kurikina management kora aro nutun condition logotey adjust kuribole para tu kiman jaruri asey etu laga ekta monduk reminder asey. 1990s picheyte,  focus tu bodli hoijaisey. Nagaland tu economy ke wapas uthabole nimitey community based economic activity te focus kora suru hoisey. Etu homoitey duita dangor initiative suru hoisey : Nagaland Bamboo Development Agency (NBDA) aro Nagaland Beekeeping and Honey Mission (NBHM). Etu duita project bi lamba homoitak growth hobole dibole aro rajya ke nijor nijor laga industry te ekta dangor khilari laga position te rakhibole laga dangor promise dhurikina thakisey. NBDA, tu March 15, 2004 te National Bamboo Mission under te banaisiley. Etu tu Nagaland para taikhan laga natural resource ke kinaka cholaiasey etu laga bisi bhal example asey. Bamboo, kuntu ke poila laga homoitey “Gorib manu laga khuri” koikina jana jaithakisey, etya etu ke “Green Gold”(green sona) koikina jana jai. Aro etu laga karon tu bamboo laga industrial raw material nimitey demand barithaka aro duniya laga market te etu laga bisi potential thaka nimitey asey. Nagaland tu ekta leading bamboo produce kora state majotey ekta asey. Nagaland tu poisa kamabole nimitey etu opportunity cholabole pari asey. NBDA para bamboo ke economic barabole laga ekta engine te bodli kuridiya laga groundwork tu already dhalidisey. Hoilebi etu laga pura potential(kabiliyat) tu bahar olabole nimitey majboot leadership, investment aro desh aro videsh company khan logotey bhal partnership lagibo. 2007 te establish huwa Nagaland Bee Keeping and Honey Mission (NBHM) tu aro ekta tarif kuribole layak initiative asey kuntu para scientific bee pala laga kaam ke promote kora te bisi dangor success hasil kurisey. Advanced management technique introduce kurikina aro harvest kora laga process ke behtar banaikina, NBHM para productivity baraisey aro pure, organic, high-quality honey produce kuribole modod kurisey. Nagaland te bee palibole nimitey 10,942 square kilometer zameen suitable thakikina, Nagaland logotey  ekta dangor honey producer hobole laga dangor potential asey. Etya Nagaland tu saal te 440 metric tons honey produce kuriasey. Aro desh aro videsh te honey laga demand barithaka tu pura kuribole nimitey hodai saal production tu 195 metric tons para baraidibole lagey. India laga honey tu Germany, USA, Japan, UK aro France nisna dangor global market te mashoor asey. Aro Nagland tu etu ageybarithaka industry laga ekta potential contributor asey. NBDA aro NBHM duita logotey bi world-class research aro training centre te barijabole laga capacity sey. Aro etu hasil kuribole nimitey state government para etu duita ke lead kuribole karney commercial expertise aro research background thaka highly trained professional ke appoint kora tu prioritize kuribo lagey. Enaka kurikina Nagaland para etu mission khan ke khali Nagaland te ekla nohoikina pura desh te flagship project khan te bodli kuridibo paribo.